İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 159 Hüküm no: 104 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrade gereğince sahipleri Arnavut olan Ayvansaray’daki fırına devlet tarafından el konulup mezada verildiği Cânib-i mîrîden Ayvansaray nâm mahâlde habbâz fırını mübâya‘ası Ma‘rûz Zahîre nâzırı izzetlü Mehmed Ârif Efendi bendeleri Âsitâne-i sa‘âdet ve bilâd-ı selâsede vâki‘ Arnabud fırınlarının Müslim hamîrkâr ve hademe-i sâiresinin mukaddemce bâ-irâde-i seniyye yerlerine re‘âyâ ve kendileri mahallerine i‘zâm ve bu def‘a dahi lâzımü’l-huzûr-ı nâzır-ı mûmâ-ileyh nezdine celb ve navul kalemi kuyûduna mürâca‘at ve tatbîk ve kā‘ide-i mer‘iyye-i mîrîyye ve ticârete tevfîk olunarak zikrolunan fırınların derûnlarında mevcûd zehâir ve bargir ve hatab bahâları ve tablakâr sâir zimmetlerinde olan matlûbâtlarının ve anbâr-ı âmire mevcûdundan aldıkları zahîre bahâsından zahîre hazînesine ve tüccârdan aldıkları zahîre bahâsından tüccâra ve hatab ve saman ve sâir zimemâtlarının yegān yegān hesâbları rü’yet ve yerlerine şimdilik ikāmet sûretiyle re‘âyâdan habbâz ustası ik‘âd ve ikāmet ettirilmiş ve sâye-i veliyyü’n-ni‘amîde nân-ı azîz husûsunda ibâdullâha zarûret çektirilmemek husûsunun vesâili istihsâl olunmuş ise de müddet-i medîde emâneten idâresinde telefâtı mûcib ve bi’l-âhare zahîre hazînesine ve tüccâra zarar ve hasârı müstevcib olmağla zikrolunan fırınlar kadîmi vechile <> şehrî Müslim ve re‘âyâdan tâliblerine füruht olunarak semen-i misilleri düyûn-ı mîrîyyelerine mahsûben zahîre hazînesine teslîm ve ba‘dehû iktizâsı vechile tüccâr ve sâir kimesnelerin matlûbâtı istifâ kılınmak şartıyla zikrolunan fırınlar başka başka mezâda verilerek her biri ne mikdâra resîde olur ise taraf-ı mûmâ-ileyhden diğer tekārîr ve defâtir ile hâk-i pây-i devletlerine ifâde kılınarak ve kādı-i Dârü’l-hilâfe tarafından dahi taharrî olunarak her kim ziyâde verir ise ona i‘tâ olunmak ve şimdilik mezâda verilmek istid‘âsı meâlinde nâzır-ı mûmâ-ileyhin takdîm eylediği memhûr takrîri bâlâsına bu dâ‘îlerine hitâben zahîre nâzırı efendinin işbu takrîri mûcibince zikrolunan fırınlar efendi-i mûmâ-ileyh ma‘rifetiyle başka başka mezâda verilerek tâlibleri miyânında arttırılıp ne mikdâra karâr eder ise ve her kim ziyâde verir ise ona verilmek üzre iktizâ eden bahâsı ma‘rifet-i şer‘ ve efendi-i mûmâ-ileyh ma‘rifetiyle tahsîl olunmak üzre zahîre hazînesine teslîmi sûretinin istihsâline mübâderet eyleyesin deyü unvânı sahh-ı âlî ile müveşşah sâdır olan fermân-ı âlîlerine imtisâlen nâzır-ı mûmâ-ileyh tarafından vekîl-i müsecceli habbâzân kethudâsı Mehmed Ağa b. Ali meclis-i şer‘-i enverde Şehrî el-Hâc Ahmed b. Süleyman ve Ahmed b. el-Hâc Mehmed nâm kimesneler ile re‘âyâdan Nikola v. Manol ve Dimitri v. İstimat ve Yorgi v. Dimitri nâm zimmîler muvâcehelerinde bi’l-vekâle takrîr-i kelâm edip İstanbul’da Ayvansaray’da vâki‘ altı horoslu bir kıt‘a habbâz fırını derûnunda mevcûde beyne’l-esnâf gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme Arnabud tâifesinden ma‘lûmü’l-esâmî kimesnelerin yedlerinde mâlları olup ve mezbûrûn bundan akdem ber-vech-i muharrer bâ-irâde-i seniyye vilâyetlerine i‘zâm ve der-dest olan defter mantûkunca mezbûrûnun cânib-i mîrîye zahîre bahâsından yedi bin yedi yüz altmış altı guruş ve tüccâra yirmi altı bin yüz on altı guruş deynleri olmağla sâdır olan fermân-ı âlî mûcibince bey‘i lâzım gelmeğin sâlifü’z-zikr âlât-ı lâzıme-i ma‘lûmenin dört re’s bargir hissesi mezbûr el-Hâc Ahmed üzerinde beş bin altı yüz kırk yedi guruşda ve yedi re’s bargir hissesi merkūm Ahmed üzerinde dokuz bin sekiz yüz seksen iki guruş on parada ve üç re’s bargir hissesi mersûm Nikola zimmî üzerinde dört bin iki yüz otuz beş guruş on parada ve beş re’s bargir hissesi mesfûr Dimitri zimmî üzerinde yedi bin elli sekiz buçuk guruş on parada ve beş re’s bargir hissesi mersûm Yorgi zimmî üzerinde kezâlik yedi bin elli sekiz buçuk guruş on parada karâr ve ziyâde ile tâlib-i âharı olmayıp ve mebâliğ-i merkūme hısas-ı mezbûrenin el-yevm semen-i misilleri idüğü ihbâr olunmağla hâlâ ben âlât-ı lâzıme-i mezkûrenin dört re’s bargir hissesini merkūm Ahmed’e meblağ-ı mezkûr beş bin altı yüz kırk yedi guruşa ve yedi re’s bargir hissesini mezbûr Ahmed’e meblağ-ı merkūm dokuz bin sekiz yüz seksen iki guruş on paraya ve üç re’s bargir hissesini mersûm Nikola zimmîye meblağ-ı mezbûr dört bin iki yüz otuz beş guruş on paraya ve beş re’s bargir hissesini mesfûr Dimitri zimmîye meblağ-ı mezkûr yedi bin elli sekiz buçuk guruş on paraya ve beş re’s bargir hissesini mersûm Yorgi zimmîye kezâlik yedi bin elli sekiz buçuk guruş on paraya bi’l-vekâle bey‘ ve teslîm ve semenleri olan cem‘an [23a] otuz üç bin sekiz yüz seksen iki guruşun üç bin guruşunu her biri hisselerine göre ber-vech-i peşîn ve mâ‘adâsı olan otuz bin sekiz yüz seksen iki guruşunu dahi kezâlik bi-kadri’l-hısas senevî biner guruş vererek mukāssatan emsâli misillü zahîre hazînesine edâ etmek üzre bi’l-vekâle ihâle eylediğimde onlar dahi ber-minvâl-i muharrer iştirâ ve tesellüm ve ber-vech-i meşrûh semen-i mecmû‘-ı mezkûru hâlâ ve mukāssatan kabzına me’mûra teslîme ta‘ahhüd etmeleriyle fîmâ-ba‘d mârrü’l-beyân gedik âlâtı merkūmûnun vech-i meşrûh üzre iştirâken mâlları olmuşdur deyü ba‘de’t-takrîr ve’t-tasdîk sâlifü’z-zikr âlât-ı lâzımenin kayd-ı atîki kaleminden ref‘ ve terkīn ve mezbûrûn el-Hâc Ahmed ve Ahmed nâm kimesneler ile Nikola ve Dimitri ve Yorgi zimmîlerin ber-minvâl-i meşrûh iştirâken isimlerine tashîhan kayd ile yedlerine sûret i‘tâsını merkūmûn istid‘â ve istid‘âları şurût-ı nizâma muvâfık olduğunu hazır bi’l-meclis bi’l-cümle nizâm ustaları ihbâr ve inbâ eyledikleri İstanbul Mahkemesi’nden huzûr. Fî 27 Ra sene 1242