İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 198 Hüküm no: 134 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çavuş Vakfı mütevellisi ile Haremeyn mütevellisinin mühürleme konusundaki ihtilafları el-Hâc Abdi Çavuş Vakfı mütevellîsi Harâccı mahallesinde iki bâb menzilin Haremeyn mütevellîsi ile temhîr nizâ‘ları Ma‘rûz İstanbul’da Harâccı mahallesinde vâki‘ el-Hâc Abdi Çavuş nâm vakfın evlâd-ı evlâd-ı utekāsından sahib-i arzuhâl es-Seyyid Mehmed Sâdık Efendi b. Mehmed Sâlim bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abulkadir Beyefendi tarafından mürsel Kâtib es-Seyyid İbrahim Efendi ma‘iyyetiyle du‘âhânemizde ma‘kūd meclis-i şer‘-i münîrde Haremeyn-i muhteremeyn vakfı mütevellîsi Elmas Osman Ağa b. Mustafa tarafından husûs-ı âtîde vekîl olduğu Mustafa Ağa b. Ahmed ve Mehmed Ağa b. Receb şehâdetleriyle sâbit olan el-Hâc Ömer Efendi b. İbrahim muvâcehesinde vâkıf-ı merkūmun mahalle-i mezbûrede kâin iki bâb menzil-i mahdûdunun gallesini meşrûtiyyet üzre ben alıp ancak ferâğ ve intikāli vukū‘unda dahi ben mütevellî olmak üzre temhîr murâd eylediğimde Haremeyn mütevellîsi müvekkil-i mûmâ-ileyh temhîr etme[me]kle men‘ olunmak murâdımdır deyü da‘vâya tesâddî etmişdim lâkin vekîl-i merkūm ibrâz edip huzûr-ı şer‘-i şerîfde muvâcehemde kırâet olunan bâlâsı mübârek ve mes‘ûd hatt-ı hümâyûn-ı übbehet-makrûn-ı hazret-i hilâfet-penâhî ile müzeyyen bir kıt‘a fermân-ı celîlü’ş-şânda bu makūle netîcesi Haremeyn mütevellîsine meşrûta evkāf-ı meşrûtun-lehâ zamanlarında dahi zâyi‘ olmamak için vukū‘ bulan ferâğ ve intikāli Haremeyn mütevellîleri temhîr ve ashâb-ı hayrın hayrâtlarını meşrûtun-lehâ bulunanlar ta‘mîr etmeyip mu‘attal kaldığından ta‘mîrine sarf için rusûmâtını dahi hazîne-i Haremeyn için almak musarrah ve mezkûr olmağla ben dahi muktezâ-yı emr-i cihân-mutâ‘ ile mücâb ve mülzem olup mütevellî-i merkūm dahi rusûmât-ı me’hûzeden lâyıkı mikdârını bana verip tatyîb ve iskâta ta‘ahhüd eyledi deyü takrîrini vekîl-i merkūm tasdîk eylediği İstanbul Mahkemesi’nden huzûr. Fî 13 Ra sene 1242