İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 197 Hüküm no: 133 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Paşa mahallesindeki bir ev, altı dükkân ve bir ahırın Haremeyn Vakfı’na ait olduğu Murad Paşa mahallesinde bir bâb menzil ve altı bâb dükkân ve bir bâb ahır keşfi Ma‘rûz Nezâret-i dâ‘îlerinde olan evkāfdan kul kethudâsı esbak merhûm Ahmed Ağa Sebîli ve mülhakātından Yusuf b. Mehmed ve Fâtıma bt. el-Hâc Ömer Vakıflarının evlâdiyet ve meşrûtiyyet üzre mütevellîsi Mehmed Es‘ad Ağa b. Yusuf savb-ı şer‘-i enverden me’zûnen mürsel Mevlânâ es-Seyyid Salih Afîf Efendi dâ‘îlerinin Pazar günü Saray-ı hümâyûnda Dîvân odasında huzûr-ı hazret-i ağa-yı Dârü’s-sa‘âdeti’ş-şerîfede ve ba‘dehû bi’t-terâzî yazıcı efendi odasında bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abulkadir Beyefendi ile akd eyledikleri meclis-i şer‘-i münîrde nezâret-i hazret-i müşârün-ileyhde âsûde Haremeyn-i şerîfeyn vakfı mütevellîsi sahib-i arzuhâl Elmas Osman Ağa b. Mustafa tarafından vekîl-i müseccel-i şer‘îsi el-Hâc Hâfız Ömer Efendi b. İbrahim muvâcehesinde mütevellîsi olduğum vakf-ı mezkûr müsakkafâtından İstanbul’da Aksaray civârında Murad Paşa mahallesinde Yusuf Paşa Çeşmesi kurbünde kâin ma‘lûmü’l-hudûd ve’l-müştemilât bir bâb menzil ve birbirine muttasıl altı bâb dükkân ve bir bâb koçaş ahırı ve bir kıt‘a bostan yedlerinde olan mütevellî temessükâtı mantûkunca müste’cirleri bulunan kimesnelerin bi’l-icâreteyn taht-ı tasarruflarında iken Haremeyn mütevellîsi müvekkil-i mûmâ-ileyh müsakkafât-ı mezkûreye Haremeyn Vakfı’dır deyü iddi‘â ve mevlânâ-yı mûmâ-ileyh ile müfettiş-i mûmâ-ileyh tarafından meb‘ûs Kâtib Abdülkadir Efendi ve sâir ümenâ-i şer‘ ve tarafeyn ile mahallerine varılıp her birinin müste’cirleri hazır oldukları hâlde ba‘de akdi’l-meclis taraf-ı şer‘-i şerîfden verilen mumzâ ve mahtûm müfredât defterinde hudûd ve müştemilât ve isim ve resim ve şöhretleri mikdâr-ı icâre ve esâmî-i mutasarrıfları tasrîhiyle müceddeden tahrîr ve kurb ve civârında bulunan bî-garaz müsinn ü ihtiyâr-ı Müslimînden muhâsebe kâtibi Mehmed Said Efendi ve Şehrî İbrahim Çavuş ve el-Hâc Murtaza Ağa ve sâir erbâb-ı vukūfdan suâl ve tahkīk olundukda müsakkafât-ı mezkûre vâkıf-ı mezbûrun vakf-ı müsecceli olup kadîmden beri Haremeyn Vakfı’nın sâbık ve lâhık mütevellîleri muvâcehelerinde bilâ-nizâ‘ zabt ve tasarruf olunageldiği alâ-tarîkı’ş-şehâde ihbâr olunduğundan mâ‘adâ vekîl-i merkūm el-Hâc Ömer Efendi dahi hâl minvâl-i muharrer üzre olduğunu bi’l-vekâle tasdîk ve fîmâ-ba‘d müdâhale etmemek üzre keff-i yed eylediğinde ben dahi netîcesi Haremeyn mütevellîlerine meşrûta evkāf hakkında şeref-bahş-ı sahîfe-i sudûr olan emr-i cihân-mutâ‘ mûcibince amel ve harekete ta‘ahhüd eyledim deyü mukırr-ı mütevellî-i mezbûr Mehmed Es‘ad Ağa’nın bi’l-cümle takrîr-i meşrûhunu vekîl-i merkūm el-Hâc Ömer Efendi tasdîk ve bu vechile bi’t-terâzî kat‘-ı nizâ‘ eylediklerini mevlânâ-yı mûmâ-ileyh ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği ba‘de’t-tenfîz İstanbul Mahkemesi’nden huzûr. Fî 8 Ra sene 1242