İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 200 Hüküm no: 137 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazırcı Zaferi v. Yani’nin, Vasil v. Yani’nin dükkânından hırsızlık yaptığını iddia ettiği, tarafların 315 guruşa sulhü 315 guruş ahz ü kabz ve ibrâ Ma‘rûz İstanbul’da Çarşı-yı Kebîr’de vâki‘ Yolgeçen Hânı derûnunda kâin bir bâb odada mütemekkin olan Hâzırcı Zaferi v. Yani nâm zimmî meclis-i şer‘-i hatîrde hân-ı mezkûrda mütemekkin Hâzırcı Vasil v. Yani nâm zimmî muvâcehesinde mersûm Vasil zimmî zimmetinde işbu târihden altı gün mukaddem işbu meclis-i şer‘de mu‘âyene olunan mâlımdan mecmû‘u altı yüz otuz guruş kıymetli beş mâ‘i çuka şalvar ve iki fes renginde çuka cübbemi bi-gayr-ı hakkın oda-i mezkûrdan ahz etmişdi deyü tesâddî eylediğim da‘vâmdan meccânen fâriğ olup ancak mersûm Vasil zimmî bana mâlından işbu meclis-i şer‘de teberru‘an üç yüz on beş guruş def‘ ü teslîm ve umûruma sarfla istihlâke emreylediğinde ben dahi yedinden ahz ü kabz emri üzre umûruma sarfla istihlâk etmemle bi’l-cümle husûs-ı mezkûra ve sâire müte‘allika âmme-i da‘vâdan tarafeynden her birimiz âharın zimmetini ibrâ-i âm ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri devletlü ser-asker paşa hazretleri kavaslarından Sadullah Kavas kullarıyla <> İstanbul Mahkemesi’nden huzûr. Fî 8 M sene [1]242