İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 200 Hüküm no: 138 Orijinal metin no: [30a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram v. Mosi’nin, tütüncü gediğini Ellez v. Ellez’e sattığı Tütüncü mübâya‘ası ve ismine kaydı Ma‘rûz Âsitâne-i aliyyede vâki‘ tütüncü esnâfından Avram v. Mosi nâm Yahûdî meclis-i şer‘-i münîrde esnâf-ı merkūmeden Ellez v. Ellez muvâcehesinde esnâf-ı merkūme kethudâsı Osman Ağa ve kethudâ vekîli el-Hâc Mustafa Ağa ve yazıcısı es-Seyyid Mehmed Nuri Efendi ve yiğitbaşısı Molla Osman ve sâir lonca ihtiyârları hazır oldukları hâlde takrîr-i kelâm edip İstanbul’da Balıkpazarı kapısı hâricinde Yemenîciler sûkunda kebeci ve bıçakçı dükkânları beynlerinde kâin ma‘den kaleminde Cibalili Mosi Yahûdî ismine mukayyed taht-ı nizâma dâhil ve mu‘teber bir bâb tütüncü dükkânı derûnunda mevcûde gedik ta‘bîr olunur âlât-ı lâzıme-i ma‘lûmenin tedâvül-i eydî ile nısfı benim ve nısf-ı âharı mersûm Ellez Yahûdinin iştirâken ve şâyi‘an yedimizde mâlımız olmağla hâlâ ben ber-vech-i muharrer mâlik olduğum nısf hisse-i şâyi‘a-i mezkûremi tarafeynden bi’l-îcâb ve’l-kabûl bâtten ve sahîhan bi-safkatin vâhidetin iki bin beş yüz guruş semen-i makbûza mersûm Ellez Yahûdiye bey‘ ve temlîk ve vech-i lâyıkı üzre teslîm eylediğimde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr müstakillen mersûm Ellez Yahûdinin mülk-i mahzı ve hakk-ı sırfı olup benim alâkam kalmamışdır deyü ba‘de’l-ikrâr ve’t-tasdîk gedik-i mezkûrun kayd-ı evveli kaleminden ref‘ ü terkīn ve müstakillen mesfûr Ellez Yahûdî ismine tashîhan kayd ile yedine sûret i‘tâsını istid‘â ve bu makūle kayd-ı evveline ta‘arruz olunmayan tütüncü gediklerinin tedâvül-i eydî ile muahharan mâlikleri isimlerine tashîhan sûret i‘tâsı muktezâ-yı şurût-ı nizâmlarından olduğunu esnâf-ı hâzırûn-ı merkūmûn ihbâr ve inhâ etmeleriyle bu sûretde gedik-i mezkûrun kayd-ı evveli ref‘ ve terkīn ve tedâvül-i eydî ile müstakillen mâliki merkūm Ellez Yahûdî ismine tashîhan kayd ile kaleminden yedine müceddeden sûret i‘tâsı bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 28 Ra sene 1242