İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 204 Hüküm no: 142 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sözlü vaad suretinde olan satışın sahih olmadığına binaen Agop v. Ohannes’in 3050 guruş davasından men olunduğu 3050 guruş men‘ Ma‘rûz Sahib-i arzuhâl Kuyumcu Agop v. Ohannes nâm zimmî meclis-i şer‘-i münîrde derûn-ı arzuhâlde mezkûru’l-ism Nargileci Agop v. Kerope zimmî muvâcehesinde mukaddemâ on üçüncü bölük çorbacısı olup hâlen me’mûren Bolu’ya azîmet üzre olan silâhşorân-ı hâssadan Mehmed Ağa b. İbrahim hazır olduğu hâlde İstanbul’da Samatya kurbünde Abdi Çelebi mahallesinde Yuvan şerbethânesi ittisâlinde mersûm Agop zimmî ile zevcesi gāibe ani’l-meclis Varvara bt. Agop nâm Nasrâniyenin bi’l-iştirâk ve bi’l-icâreteyn mutasarrıflar oldukları menzil tahtında kâin bir bâb <> kahvehânenin gediği hâzır-ı merkūm Mehmed Ağa’nın mâlı olup mersûm Agop dahi şirâya tâlib oldukda beş bin guruş istediğinden alamayıp ba‘dehû benim ağa-yı merkūm ile ülfetim olmak hasebiyle bana gedik-i mezkûru sen kendin iştirâ eyle sonra ben senden satın alırım deyip ben dahi gedik-i mezkûru iki yüz kırk bir senesi Şevvalinin altıncı günü hâzır-ı merkūmdan akdi kendi nefsime izâfetle üç bin elli guruş semen-i medfû‘a iştirâ ve kabz ve dükkân-ı mezkûru dahi zevcân-ı mesfûrândan beher şehr beşer buçuk guruş kirâ ile istîcâr ve bu âna kadar derûnunda temekkün etmişdim lâkin bu def‘a kahvehâne-i mezkûre bâ-fermân-ı âlî sedd ü bend ve ocağı hedm olduğundan intifâ‘ım munkatı‘ olmağla öyle olıcak mücerred senden satın alırım dediğine binâen hâzır-ı mezbûra verdiğim semen-i mezkûr üç bin elli guruşu mersûm Agop zimmîden taleb ederim deyü da‘vâ [31a] ve hâzır-ı merkūm Mehmed Ağa ve mesfûr Agop zimmî bu kazıyyeyi külliyen münkir olmalarıyla ilzâm için mübâşiri ma‘rifetiyle tarafeyn fetvâ-yı şerîfeye havâle ile istiftâ olundukda takrîr-i meşrûhu üzre kelâm-ı mezkûr tevkîl-i şer‘î olmayıp va‘d makūlesinden olduğu iftâ buyrulduğunu tarafeyn meclis-i şer‘de tasdîk etmeleriyle bu sûretde ber-muktezâ-yı şerî‘at-ı garrâ müdde‘î-i mersûm meblağ-ı mezkûr üç bin elli guruşu mesfûr Agop zimmîden da‘vâya kādi[r] olmadığı kendüye tefhîm ve bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 20 R sene 1242