İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 206 Hüküm no: 144 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mehmed Usta b. Mehmed’in, berber gediğini başka bir yere nakletmesi gerektiği Husûsla berber gediği nakli Ma‘rûz Sâdır olan fermân-ı âlîlerine imtisâlen zikri âtî husûsu mahâllinde lede’l-mu‘âyene keşf ve tahrîr-içün taraf-ı dâ‘iyânemden me’zûnen irsâl olunan Kâtib Mehmed Hidâyetullâh Efendi dâ‘îleri [ve] hâssa mi‘mârı hulefâsından Mehmed Tahir ve Abdullah Halîfeler ile nezâret-i hazret-i sadâret-penâhîde âsûde evkāfdan Ebulfeth Sultân Mehmed Han -aleyhi’r-rahmetü ve’l-gufrân- hazretlerinin vakfından olup câmi‘-i şerîf-i mezkûr civârında Karaman-ı Kebîr’de bu def‘a bâ-irâde-i seniyye nef‘an li’l-vakf üzerine müceddeden dekâkîn binâ olunmakda olan bîmarhâne arsasında Enserciler karşısında küşâd olunan kapıdan girerken sağ cânibde birinci olarak binâsına şurû‘ olunacak mi‘mârân-ı mezbûrân misâhalarıyla tûlen on buçuk arzan dokuz zirâ‘ olarak alâmât-ı fâsıla vaz‘ıyla mümtâz olan zikri âtî dükkân arsasına varıp huzûr-ı Müslimînde akd-i meclis-i şer‘-i nebevî ettikde sahib-i arzuhâl Berber es-Seyyid el-Hâc Mehmed Usta b. es-Seyyid Mehmed nâm kimesne meclis-i ma‘kūd-ı mezkûrda vakf-ı şerîf-i mezkûrun kāimmakām-ı mütevellîsi dergâh-ı mu‘allâ kapıcıbaşılarından sa‘âdetlü Osman Bey tarafından mürsel tasdîka vekîl-i şer‘îsi mühürdâr-ı vakf mevâlî-i ızâmdan fazîletlü es-Seyyid Mehmed Said Efendi b. Hâfız Mehmed Sâlim Efendi hazır olduğu hâlde işbu arzuhâl hâmişine ihrâc olunan Başmuhâsebe derkenârı mantûkunca vakf-ı şerîf-i mezkûr müsakkafâtından câmi‘-i şerîf havlîsinde kolluk sırasında Mustafa Usta dükkânı ittisâlinde kâin bir bâb berber dükkânı derûnunda mevcûde benim ismime mukayyed şurût-ı nizâmda [nizâma] dâhil beyne’l-esnâf gedik ta‘bîr olunur mâlik olduğum âlât-ı lâzıme-i ma‘lûmeyi hâvî olan dükkân-ı mezkûr bundan akdem bâ-irâde-i aliyye sâir etrâfında olan dekâkîn ile hedm olunmağla zikrolunan gedik âlât-ı lâzımesi bilâ-mu‘accele mütevellî-i müvekkil-i mûmâ-ileyhin senevî yirmi guruş icâre-i müeccele ile bana îcâr ben dahi istîcâr ve kabûl edip ol vechile taht-ı tasarrufumda olan arsa-i mahdûde-i mezkûre üzerine mâlımla teberru‘an li’l-vakf mu‘accelesine mahsûben binâ edeceğim berber dükkânına naklolunmak bâbında müsâ‘ade-i aliyye erzânî buyurulmak niyâzımdır dediğini vekîl-i mûmâ-ileyh ba‘de’t-tasdîk bu makūle berber gediği âhar gedikden hâlî kurb ve civâr olan dükkâna naklolunageldiğini hazır bi’l-meclis mazbûtü’l-esâmî esnâf-ı mezkûre kethudâsı ve şeyhi ve çavuşu ve sâir ustalar ihbâr eylediklerini kâtib-i mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin bu sûretde gedik-i mezkûrun mahâll-i evveli kaydı kaleminden ref‘ ve terkīn ve mahâll-i sânîye nakl ile sahib-i arzuhâl merkūm Berber es-Seyyid el-Hâc Mehmed yedine bir kıt‘a sûret i‘tâsı muktezâ-yı maslahat olduğu İstanbul Mahkemesi’nden huzûr. Fî 26 R sene 1242