İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 207 Hüküm no: 145 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Pandeli’nin, Mehmed Ağa b. Ali’den aldığı uncu değirmeni gediğinin bir horosunu başka bir değirmene naklettiği Uncu değirmeni mübâya‘ası ve mahâll-i âhara nakli Tashîhi vâki‘dir - sahh - es-Seyyid Veliyyullâh Ma‘rûz Âsitâne-i aliyyede vâki‘ habbâzân kethudâsı Mehmed Ağa b. Ali meclis-i şer‘-i münîrde Habbâz Todori v. Pandeli zimmî muvâcehesinde uncular kethudâsı Ali Ağa ve esnâflarından Osman Ağa ve Bedri-zâde İsmail Ağa Çeteci-zâde Emin Ağa ve Mustafa Ağa ve sâirleri hazır oldukları hâlde İstanbul’da Zeyrek kurbünde kâin Asmalı Değirmen demekle meşhûr altı horoslu bir kıt‘a uncu değirmeni derûnunda mevcûde gedik ta‘bîr olunur yirmi dört re’s bargir ve sâir âlât-ı lâzıme-i ma‘lûmeden mâlik olduğum bir horos i‘tibâr olunan dört re’s bargir ve onlara isâbet eden sâir âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin<> iki bin dört yüz guruş semen-i makbûza mersûm Todori zimmîye bey‘ ve temlîk ve vech-i lâyıkı üzre teslîm eylediğimde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d zikrolunan bir horos i‘tibâr olunur dört re’s bargir ve sâir âlât-ı lâzıme-i ma‘lûme mesfûr Todori zimmînin mülk-i müşterâsı ve hakk-ı sırfı olup benim alâkam kalmamışdır deyü ba‘de’t-takrîr ve’t-tasdîk mersûm Todori zimmî sâlifü’z-zikr bir horos i‘tibâr olunan dört re’s bargir ve onlara isâbet eden sâir âlât-ı lâzıme-i ma‘lûmeyi mârrü’z-zikr Asmalı Değirmeni’nden ref‘ <> ve kemâ-kân uncu olmak üzre İstanbul’da Fenerkapısı dâhilinde kâin gediğine mâlik olduğu beş horoslu bir kıt‘a habbâz değirmenine nakl ile mahâl ve ism-i evvelin kaydları terkīn ve mahâll-i sânî-i mezkûrda mu‘teber ve müstakar olmak üzre kendi ismine tashîhan kayd ve yedine bir kıt‘a sûret i‘tâsını istid‘â ve istid‘âsı şurût-ı nizâma muvâfık olduğunu kethudâ ve esnâf-ı merkūmûn ihbâr ve inhâ etmeleriyle bu sûretde ber-mûcib-i şurût-ı nizâm istid‘âsına müsâ‘ade-i seniyyeleri erzânî buyurulmak iktizâ eylediği İstanbul Mahkemesi’nden huzûr. Fî 26 Ra sene 1242