İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 208 Hüküm no: 146 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband Mehmed Ağa b. Mahmud’un, bir aded evdeki hissesini diğer hissedar Ayşe Hatun b. Ahmed’e devrettiği Haraççı Muhyiddin mahallesinde menzil ferâğı Nüshateyn Ma‘rûz Sahib-i arzuhâl Na‘lband Mehmed Ağa b. Mahmud nâm kimesne bi’t-terâzî du‘âhâne-i dâ‘îhânelerinde ma‘kūd meclis-i şer‘-i münîrde derûn-ı arzuhâlde mezkûreti’l-ism mu‘arrefetü’z-zât Âişe bt. Ahmed nâm hatun mahzarında nezâret-i dâ‘îlerinde olan evkāfdan İstanbul’da Ebulfeth Sultân Mehmed Han -aleyhi’r-rahmetü ve’l-gufrân- Hazretleri Câmi‘-i şerîfi kurbünde vâki‘ ashâb-ı hayrâtdan merhûm Haraççı Muhyiddin mahallesi mescid-i şerîfi vakfının mütevellîsi kezâlik zât-ı mu‘arrefe Şerife Halide Hanım bt. Salih hâzıra olduğu hâlde zikrolunan Haraççı Muhyiddin mahallesinde vâki‘ bir tarafdan kuzâtdan İbrahim Edhem Efendi menzili ve bir tarafdan börekçi zevcesi arsası ve bir tarafdan mescid-i şerîf-i mezkûr ve taraf-ı râbi‘i tarîk-ı âm ile mahdûd müştemilât-ı ma‘lûmeyi hâvî şehriye yirmi akçe icâre-i müecceleli bir bâb menzile mutasarrıf Mehmed Sâdık Efendi b. İbrahim hayatında bin iki yüz kırk bir senesi şehr-i Rebî‘ülevvelinin on yedinci günü nısfını bana ve nısf-ı âharını zevcesi mezbûre Âişe Hatun’a meccânen fâriğ ve mütevelliyesi hâzıra-i mezbûre dahi vech-i meşrûh üzre tasarrufumuza izin verdikden sonra biz sene-i mezbûre Recebi’l-ferdi gurresinden i‘tibâren evvelen ben müstakkıllen bir sene ve sâniyen mezbûre Âişe Hatun kezâlik müstakilleten bir sene zabtetmek üzre mütevelliye-i hâzıra-ı mezbûrenin izniyle kur‘a-i şer‘iye olunarak bâ-i‘lâm akd-i muhâyee etmişdik el-hâletü hâzihî biz beynimizde bi’t-terâzî fesh-i akd-i muhâyee-birle ben menzil-i mahdûd-ı mezkûrda olan nısf hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile sekiz yüz guruş bedel-i makbûz-ı müstehlek mukābelesinde mezbûre Âişe Hatun’a ferâğ ve tefvîz ve teslîm eylediğimde ol dahi tefevvüz ve kabûl ve mütevelliye-i hâzıra-i mezbûre dahi tasarrufuna izin verip ol vechile menzil-i mahdûd-ı mezkûrun mecmû‘u üzre Âişe Hatun’un dâhil-i havza-i tasarrufu ve hakk-ı müfevvazı olup benim kat‘a alâka ve medhalim kalmamağla bi’l-cümle menzil-i mezkûr husûsuna ve bedel-i müstehlek-i mezkûrun istirdâdına müte‘allika da‘vâdan tarafeynden her birimiz âharın zimmetini ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü takrîrini merkūme Âişe Hatun ile mütevelliye-i hâzıra-i mezbûre [Şerife] Hâlide Hanım’dan her biri tahkīk ve tasdîk eylediği İstanbul Mahkemesi’nden huzûr. Fî 22 Ra sene 1242