İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 209 Hüküm no: 148 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasralı İsmail Kaptan b. Ali’nin gemi yapıp sattığı davalıları ile 2000 guruşa sulh olduğu 2000 guruşa sefîne nizâ‘ından sulh ve ibrâ Nüshateyn Sahib-i arzuhâl Amasralı Hacı Hüseyin oğlu es-Seyyid İsmail Kaptan b. es-Seyyid Ali nâm kimesne meclis-i şer‘-i münîrde derûn-ı arzuhâlde mezkûr Âsitâne-i aliyyede vâki‘ revgan-ı zeyt tüccârından nâzır el-Hâc Hüseyin Ağa b. Hasan ve es-Seyyid el-Hâc Ali Ağa b. <> Osman ve kuru yemişçi esnâfından kethudâ Mustafa Ağa b. Halil ve el-Hâc Hasan Ağa b. Hüseyin ve balmumcu esnâfından kethudâ es-Seyyid el-Hâc Ahmed Ağa b. es-Seyyid Mahmud ve el-Hâc Mehmed Ağa b. Ahmed ve Odunkapısı kethudâsı Ömer Ağa b. Veliyüddin ve ihtiyârlarından Molla Mustafa b. Osman ve Hasan Ağa b. Ahmed ve sâirleri mahzarlarında ben bundan akdem dört aded esnâf kethudâ ve ihtiyârlarının bi-şartı’r-rücû‘ Bolu sancağında Amasra kazâsında Çakraz İskelesi’nde müceddeden çenber ta‘bîr olunur bir kıt‘a sefîne binâ ve inşâ ve derûnuna âlât-ı lâzıme ve edevât-ı ma‘lûmesini vaz‘ ve tekmîl-birle Galata’da Kalafat Yeri nâm mahalle getirip mezbûrûna teslîm etmemle sefîne-i mezkûre ve âlât ve edevât-ı sâiresine mâlımdan masrûfum olup bi’l-mürâca‘a hakkım olan elli dokuz bin guruşun kırk bir bin guruşunu mezbûrûn mukaddemâ bana edâ ve teslîm ben dahi yedlerinden ahz ü kabz etmemle bakīsi olan on sekiz bin guruşu mezbûrûndan taleb ve da‘vâya tesâddî eylediğimde evvelen ber-mûcib-i emr-i âlî sefîne-i mezkûre Tersâne-i âmire mi‘mârbaşısı ve Kapan-ı dakīk tüccârı ve sâir erbâb-ı vukūf ma‘rifetleri ve ma‘rifet-i şer‘le mahâllinde keşfolundukda ma‘a-sandal ve filika yirmi dört bin dört yüz dokuz guruşa bâliğ ve derûnuna vaz‘ eylediğim makara ve demir ve yelken ve halat ve sâir âlât-ı sefîneye masrûfum ber-mûcib-i defter-i müfredât on dokuz bin beş yüz üç guruşa resîde ve ol vechile cem‘an kırk üç bin dokuz yüz on iki guruşdan ber-vech-i bâlâ makbûzum olan kırk bir bin guruş fürû-nihâde olundukda bâkī iki bin dokuz yüz on iki guruş hakkım olduğu zâhir olup ancak esnâf-ı mezbûrdan sefîne-i mezbûreye vaz‘ eylediğin demir ve halat ve yelken ve sâir edevâtın vezni ve zirâ‘ı ve adedi tahrîr eylediğin defterden noksan olmağla vezn ve ta‘dâd olunmasını iltimâs eylediklerinde muslihûn tavassutuyla beynimiz te’lîf olunup esnâf-ı merkūmûn bu def‘a bana mâllarından işbu meclis-i şer‘de beşer yüz guruşdan cem‘an iki bin guruş def‘ ü teslîm ben dahi yedlerinden ahz ü kabz edip mâ‘adâ müdde‘âma ve bi’l-cümle zikrolunan husûslara ve hukūk-ı sâire-i şer‘iyeye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik deyü ikrâr ve tasdîkleri İstanbul Mahkemesi’nden huzûr. Fî 21 R sene 1242