İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 210 Hüküm no: 149 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Mustafa’nın, ev tamiri bedelinden Maydoslu Aci Kostandi ve Yorgi ile 2500 guruşa sulh olduğu Husûs ile menzil ta‘mîri ücretinden 2500 guruşa sulh ve edâya tenbîh Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde ber-nehc-i şer‘î istimâ‘ ve fasl u hasm için savb-ı şer‘-i enverden me’zûnen bi’l-hükm irsâl olunan Kâtib es-Seyyid Salih Afîf Efendi dâ‘îleri bi’l-ma‘iyye rü’yete me’mûr hâlâ Galata Kādısı Âşir Efendi-zâde fazîletlü Mehmed Tâceddin Efendi tarafından mürsel Kâtib Ömer Efendi ve hâssa mi‘mârı hulefâsından Abdülkadir ve Sâfî Mustafa Halîfeler ile kapdan-ı deryâ vezîr-i mükerrem sa‘âdetlü atûfetlü paşa hazretleri nezâret-i aliyyelerinde âsûde olup umûr-ı şer‘iyesini beldesi hâkimi olan Galata kādıları efendiler rü’yet edegeldikleri kasaba-i Kasımpaşa’da Piyale Paşa Vakfı müsakkafâtından İstanbul’da Haydarpaşa kurbünde Hacı Ferhad mahallesinde kâin Altıncıbaşı el-Hâc Ali Ağa b. el-Hâc Mustafa’nın bi’l-icâreteyn mutasarrıf olduğu bir bâb menzile varıp mahalle-i mezbûre imâmı el-Hâc Mehmed Emin Efendi ve Bıçakçı Mescidi İmâmı es-Seyyid Mustafa Efendi ve ahâlîsinden eşrâf-ı kuzâtdan es-Seyyid Mustafa Efendi ve rûznâmçe-i evvel kalemi küttâbından el-Hâc İsmail Efendi ve es-Seyyid Mehmed Said Ağa ve sâirleri hazır oldukları hâlde akd-i meclis-i şer‘-i nebevî ettiklerinde tüccâr kalfalarından sahib-i arzuhâl Maydoslu Aci Kostandi v. Yorgi nâm zimmî meclis-i ma‘kūd-ı mezkûrda merkūm el-Hâc Ali Ağa muvâcehesinde işbu derûnunda akd-i meclis-i şer‘-i âlî olunan bir bâb menzili mezbûrun bi-şartı’r-rücû‘ emriyle mâlımdan ta‘mîr ve ba‘zı mahallerini tecdîd etmemle cem‘an masrûfum olan on altı bin beş yüz guruşdan gayrı ez-teslîmât sahhu’l-bâkī alacağım olan bin üç yüz yetmiş beş guruşu mezbûrdan bi’l-mürâca‘a taleb ve da‘vâ eylediğimde ol dahi cevâbında ol mikdâr masrûfumu inkârından mâ‘adâ benim gāib ani’l-beled Mehmed Emin nâm kimesne zimmetinde alacağım olan bin elli guruşu gāib-i mezbûrdan alabilir isen deynimin ol mikdârına mahsûb eyle deyü seni kabza-i tevkîl etmemle öyle olıcak meblağ-ı mezkûru henüz gāib-i mezbûrdan eğerçi bi’l-vekâle kabz edememiş isen de mücerred beynimizde böylece lâkırdısı olduğuna binâen meblağ-ı merkūmu deynimin ol mikdârına tutarım deyip evvelen mikdâr-ı masrûfu fenn-i mi‘mârîyeye tatbîkan keşf ve meblağ-ı mezkûr bin elli guruş husûsu dahi fetvâ-yı şerîfeye havâle olunmuşdu el-hâletü hâzihî husûs-ı mezkûru mübâşir ma‘rifetiyle tarafeyn bi’l-muvâcehe lede’l-istiftâ bu mertebe ile kable’l-kabz şer‘an deynine takāsa kādir olmadığı taraf-ı şer‘-i şerîfden merkūm el-Hâc Ali Ağa’ya tefhîm olundukda ol dahi mücâb ve mülzem ve ben dahi mâ‘adâ müdde‘âmdan merkūm Ali Ağa ile bi’t-tav‘ ve’r-rızâ iki bin beş yüz guruşa kabûlünü hâvî sulh olmamla bedel-i sulh-ı mezkûr ile meblağ-ı merkūm bin elli guruşdan mâ‘adâ ziyâde müdde‘âma ve bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü mersûmûnun bi’l-cümle takrîrini merkūm el-Hâc Ali Ağa tasdîk ve bedel-i sulh-ı merkūm iki bin beş yüz guruş ile meblağ-ı mezkûr bin elli guruşu mersûm Kostandi zimmîye edâya ta‘ahhüd ve külliyen kat‘-ı nizâ‘ eylediklerini kâtibân-ı mûmâ-ileyhimâ meclis-i şer‘a inhâ eyledikleri ba‘de’t-tenfîz İstanbul Mahkemesi’nden huzûr. Fî 29 Ra sene 1242