İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 221 Hüküm no: 158 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serpohi bt. Kirkor’un, tuhafçı ve fincancı gediğini Kirkor v. Avadis ile İstefan v. Kirkor’a sattığı Tuhafçı ve fincâncı dükkânı mübâya‘ası Ma‘rûz Şahsı mu‘arrefe Serpohi bt. Kirkor Nasrâniye meclis-i şer‘-i münîrde Kirkor v. Avadis ve İstefan v. Kirkor zimmîler muvâcehelerinde takrîr-i kelâm edip İstanbul’da Sultân Bâyezid Câmi‘-i şerîfi havlîsinde bu def‘a bâ-irâde-i aliyye-i cenâb-ı hilâfet-penâhî hedm ve ref‘ olunan Kolluk tahtında çeşme sırasında Kigork dükkânı ittisâlinde kâin Başmuhâsebe’de mukayyed ve mu‘teber ve taht-ı nizâma dâhil bir pay hisseli bir bâb tuhafçı ve fincâncı dükkânının bi’l-müsâ‘ade tahlîs olunup bâ-sûret mâlike olduğum gedik âlâtı ta‘bîr olunur bir çekmece ve bir akçe tahtası ve bir minder ve sâir eşyâ-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin altı yüz yirmi dört guruş semen-i makbûza mersûmân Kirkor ve İstefan zimmîlere ale’l-iştirâki’s-seviy bey‘ ve temlîk ve teslîm eylediğimde onlar dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mesfûrân Kirkor ve İstefan zimmîlerin ale’l-iştirâki’s-seviy mâlları olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun kayd-ı evveli ref‘ ve terkīn ve mersûmân Kirkor ve İstefan zimmîler isimlerine tashîhan kayd ile yedlerine sûret i‘tâsını istid‘â eyledikleri İstanbul Mahkemesi’nden huzûr. Fî 19 R sene 1242