İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 221 Hüküm no: 159 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Ohan’ın, fincancı gediğini Kristosor v. Kirkor’a sattığı Fincâncı dükkânı mübâya‘ası Ma‘rûz Âsitâne-i aliyyede vâki‘ fincâncı esnâfından Bogos v. Ohan zimmî meclis-i şer‘-i münîrde esnâf-ı merkūmeden Kristosor v. Kirkor zimmî muvâcehesinde takrîr-i kelâm edip İstanbul’da Sultân Bâyezid Câmi‘-i şerîfi havlîsinde bu def‘a bâ-irâde-i seniyye-i hazret-i zıllullâhî hedm ve ref‘ olunan Kolluk tahtında çeşme sırasında Avanes zimmî dükkânı ittisâlinde kâin Başmuhâsebe’de mukayyed ve mu‘teber ve taht-ı nizâma dâhil bâ-sûret yarım yapılı bir bâb fincancı dükkânının bi’l-müsâ‘ade tahlîs olunan gedik âlâtı ta‘bîr olunur bir çekmece ve bir peş-tahta [pîş-tahta] ve bir minder ve sâir eşyâ-yı ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin yedi yüz guruş semen-i makbûza mersûm Kristosor zimmîye bey‘ ve temlîk ve teslîm eylediğimde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mesfûr Kristosor zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun kayd-ı evveli ref‘ ve terkīn ve mersûm Kristosor zimmî ismine tashîhan kayd ile yedine sûret i‘tâsını istid‘â eyledikleri İstanbul Mahkemesi’nden huzûr. Fî 19 R sene 1242