İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 223 Hüküm no: 161 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine bt. Ahmed Hatun’un, Şeritçi Kigork v. Manav Sağak ile 350 guruşa sulh olduğu Teberru‘an 350 guruş def‘ ü teslîm ve şeridci destgâhı kat‘-ı nizâ‘ı ve ibrâ Ma‘rûz Sahibe-i arzuhâl mu‘arrefetü’z-zât Şerife Emine bt. es-Seyyid Ahmed nâm hatun bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi tarafından mürsel Kâtib Mehmed Ârif Efendi dâ‘îleri ma‘iyyetiyle akd olunan meclis-i şer‘-i münîrde derûn-ı arzuhâlde mastûrü’l-ism Şeridci Kigork v. Manav Sağak zimmî muvâcehesinde benim mersûm Kigork zimmîden teyzelerim müteveffât Şerife Hafize ve Şerife Fâtıma Hatunların terekelerinden dolayı taleb eylediğim bin guruş husûsu mersûmun yedinde olup bin iki yüz kırk bir senesi şehr-i Rebî‘ülâhirinin yirmi dokuzuncu günü târihiyle müverrah İstanbul Mahkemesi’nden verilen bir kıt‘a mufassal i‘lâm-ı şer‘îde tasrîh ve beyân olunduğu üzre sâdır olan fermân-ı âlî-şâna imtisâlen sâbıkā İstanbul kādısı fazîletlü el-Hâc Mehmed Sâdık Efendi tarafından me’zûnen mürsel Mevlânâ es-Seyyid Salih Afîf Efendi’nin müfettiş-i mûmâ-ileyh ile Pazar günü dîvân odasında huzûr-ı hazret-i ağa-yı Dârü’s-sa‘âdeti’ş-şerîfede akd eylediği meclis-i şer‘-i şerîfde zimmî-i mesfûr ile bi’l-muvâcehe lede’l-mürâfa‘a şer‘an bir nesne lâzım gelmediği bana tefhîm olunmuşdu lâkin ben ta‘cîz ve nizâ‘dan hâlî olmadığıma binâen mersûm Kigork zimmî kat‘an li’n-nizâ‘ ve def‘an li’l-husûme bana mâlından teberru‘an üç yüz elli guruş def‘ ü teslîm ve umûruma sarfla istihlâke emreylediğinde ben dahi ahz ü kabz ve emri üzre umûruma sarfla istihlâk edip meblağ-ı mezkûr mukābelesinde istiğlâl zu‘muyla yed ve zabtımda olup i‘lâm-ı mezkûrda zikrolunduğu vechile teslîmine tenbîh-i şer‘î lâhık olan iki kıt‘a şeridci destgâhı ve hüccetlerini mesfûra teslîm ile fîmâ-ba‘d vechen mine’l-vücûh ve sebeben mine’l-esbâb hakkım ve alacağım ve asla ve kat‘a alâka ve medhalim ve bir gûne da‘vâ ve nizâ‘ ve husûmetim kalmamağla bi’l-cümle husûs-ı mezkûra ve sâir beynimizde cereyân eden cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Kigork zimmînin zimmetini şurût-ı müfsideden ârî ve uhûd-ı mubtıladan berî cebr ü kerhden hâlî ibrâ-i âmm-ı sahîh-i şer‘î ve ıskāt-ı tâmm-ı sarîh-i mer‘î ile ibrâ ve ıskāt eyledim deyü takrîrini mesfûr Kigork zimmî tasdîk eylediği İstanbul Mahkemesi’nden huzûr. Fî 27 min-S sene 1242