İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 222 Hüküm no: 160 Orijinal metin no: [34a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. İbrahim’in Kasımpaşa’daki uncu değirmenindeki hisselerini, Katerina bt. Vidal’e sattığı Uncu değirmeni mübâya‘ası Ma‘rûz Âsitâne-i aliyyede vâki‘ habbâz esnâfından el-Hâc Mehmed Ağa b. İbrahim nâm kimesne meclis-i şer‘-i münîrde bâ‘isetü’l-i‘lâm Katerina bt. Vidal nâm Nasrâniye tarafından husûs-ı âti’l-beyânda tasdîka vekîl-i şer‘îsi Yani v. Nikola zimmî muvâcehesinde takrîr-i kelâm edip mahrûse-i Galata’ya muzâfe kasaba-i Kasımpaşa’da Cum‘a Pazarı nâm mahâlde vâki‘ beş horoslu bir kıt‘a uncu değirmeni derûnunda mevcûde beyne’l-esnâf gedik ta‘bîr olunur yirmi re’s bargir ve sâir âlât-ı lâzıme-i ma‘lûme bâ-sûret müstakillen yedimde mülküm olmağla hâlâ ben ber-vech-i muharrer mâlik olduğum âlât-ı gedik-i mezkûrun sekiz re’s bargirini mukaddemâ âhara bâ-hüccet-i şer‘iye bey‘ etmemle mâ‘adâ on iki re’s bargir ve onlara isâbet eden sâir âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin müvekkile-i mersûmeye on sekiz bin guruş semen-i medfû‘ ve makbûza bey‘ ve temlîk ve vech-i lâyıkı üzre teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt etmemizle fîmâ-ba‘d sâlifü’z-zikr on iki re’s bargir ve onlara isâbet eden sâir âlât-ı lâzıme-i ma‘lûme müvekkile-i mersûme Katerina Nasrâniyenin mülk-i müşterâsı ve hakk-ı sırfı olup benim asla ve kat‘a alâka ve medhalim kalmamışdır deyü ba‘de’t-takrîr ve’t-tasdîk sâlifü’l-beyân on iki re’s bargir ve onlara isâbet eden sâir âlât-ı lâzıme-i ma‘lûme kaydı bâyi‘-i merkūm el-Hâc Mehmed Ağa’nın üzerinden ref‘ ve terkīn ve müvekkile-i mersûme Katerina Nasrâniyenin ismine tashîhan kayd ile yedine müceddeden sûret i‘tâsını vekîl-i mersûm istid‘â ve istid‘âsı şurût-ı nizâmlarına mutâbık olduğunu hazır bi’l-meclis habbâzân kethudâsı Ali Ağa ve sâir mazbûtü’l-esâmî nizâm ustaları ihbâr ve inhâ eyledikleri İstanbul Mahkemesi’nden huzûr-ı âlîlerine i‘lâm olundu. Fî 27 Rebî‘ülâhir sene 1242 [Beyaz Beyaz]