İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 224 Hüküm no: 163 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Tanaş’ın, tasarruf ettiği kasab gediklerine ait temessüklerin yenilenmesini talep ettiği < İşbu i‘lâmda sehv vâki‘ olmağla terkīn olunup ikinci sahîfeye müceddeden kayd-şüde Abdurrahmân Ma‘rûz Kasab tâifesinden Kosta v. Tanaş zimmî meclis-i şer‘-i münîrde kasablar kethudâsı el-Hâc Hasan Ağa hazır olduğu hâlde takrîr-i kelâm edip hudâvendigâr-ı esbak cennet-mekân Sultân Abdülhamid Han -tâbe serâhu- hazretleri evkāf-ı celîlelerinden Yedikule hâricinde kâin selhhâne-i mîrî on aded ganem ve dördüncü selhhâneye merbût kasab dükkânlarından Bebek karyesinde bir bâb ve Rumelihisarı karyesinde iki bâb ve Arnabud karyesinde bir bâb ki cem‘an dört bâb kasab dükkânları gediklerinin birer rub‘ hisse-i şâyi‘alarıyla beşinci selhhâneye merbût Kuruçeşme karyesinde bir bâb kasab dükkânı gediğinin rub‘ ve nısf-ı sümün[hisse-i] şâyi‘asını otuz dokuz senesi Cumâdelâhirenin yirmi birinci günü bir kıt‘a temessük ile ve sâlifü’z-zikr dört bâb dükkân gediklerinin kezâlik birer rubu‘ hisse-i şâyi‘alarına mârrü’z-zikr bir bâb dükkân gediğinin kezâlik rubu‘ ve nısf-ı sümün hisse-i şâyi‘asını kırk senesi Muharreminin yirmi yedinci günü âhar bir kıt‘a temessük ile mutasarrıfından bâ-izn-i mütevellî tefevvüz etmişdim lâkin yedimde olan temessükler fersûde ve atîk ve hısas-ı mezkûre dahi muhtelit olmağla mutasarrıf olduğum hisselerim muktezâ-yı şer‘-i şerîf üzre îzâh ve tefrîk ve her bir dükkân için başka başka temessük i‘tâsı niyâzımdır deyü istid‘â ve yedinde olan temessükleri ibrâz ettikde kelâmı vâkı‘a mutâbık olduğunu temessük-i mezkûrlar musaddak ve kethudâ-yı hâzır-ı merkūmun ihbârıyla dahi mütehakkık olmağın bu sûretde zikrolunan Bebek ve Arnabud karyelerinde birer bâb ve Rumelihisarı karyesinde iki bâb ki cem‘an dört bâb dükkân ve dükkân gediklerinin nısf-ı şâyi‘leri ve zikri mürûr eden Kuruçeşme karyesinde olan bir bâb dükkân gediğinin nısf ve sümün ya‘nî on altı sehm i‘tibârıyla on sehm-i şâyi‘-i mersûm Kosta zimmînin hakk-ı müfevvazı olmağla yedinde olan atîk temessükler ahz ve battalda hıfz ile tafsîl olunduğu vech üzre her bir dükkânda olan hisse-i şâyi‘alar için ber-vech-i îzâh başka başka temessük i‘tâsı iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 20 min-M sene 1242 >>