İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 225 Hüküm no: 164 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Tanaş’ın, kasab gediği hisselerinden bir kısmını Nikola v. Yani ile Hristo v. Yorgi’ye devrettiği Kasab ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -aleyhi’r-rahmetü ve’l-gufrân- hazretleri evkāf-ı celîlelerinden Yedikule hâricinde vâki‘ gayrı-ez selhhâne-i mîrî on aded ganem selhhânelerinden beşinci selhhâneye merbût kasab dükkânlarından Boğaziçi’nde Mîrgûnoğlu’nda Baltalimanı kurbünde keresteci dükkânı karşısında meydânda vâki‘ bir bâb kasab dükkânı derûnunda mevcûde gedik ta‘bîr olunur âlât-ı lâzıme-i ma‘lûmenin on sekiz sehm i‘tibârıyla altı sehmi el-Hâc Hasan nâm kimesnenin ve altı sehmi dahi Dimo zimmînin ve altı sehmi dahi Kosta v. Tanaş zimmînin bâ-temessük-i mütevellî bi’l-icâreteyn taht-ı tasarruflarında olmağla mersûm Kosta zimmî meclis-i şer‘-i münîrde Nikola v. Yani ve Hristo v. Yorgi zimmîler muvâcehelerinde kasablar kethudâsı el-Hâc Hasan Ağa hazır olduğu hâlde takrîr-i kelâm edip ben ber-vech-i muharrer mutasarrıf olduğum altı sehm hisse-i şâyi‘amın üç sehmini uhdemde ibkā ve mâ‘adâ üç sehmin iki sehmini mersûm Nikola zimmîye ve bir sehmini dahi mesfûr Hristo zimmîye hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî ferâğ ve tefvîz ve teslîm eylediğimde onlar dahi tefevvüz ve kabûl etmeleriyle fîmâ-ba‘d zikrolunan üç sehm hisse-i şâyi‘ada benim alâkam kalmayıp iki sehmi mersûm Nikola zimmînin ve bir sehmi dahi mesfûr Hristo zimmînin dâhil-i havza-i tasarrufları ve hakk-ı müfevvazları olmuşdur deyü takrîrini zimmiyân-ı mesfûrân tasdîk etmeleriyle bu sûretde gedik-i mezkûr ber-vech-i bâlâ on sekiz sehm i‘tibârıyla gāibân ani’l-meclis merkūmân el-Hâc Hasan ve Dimo zimmîlerin hisse-i mezkûrelerinden mâ‘adâsı olan altı sehmin üç sehmi mersûm Kosta zimmînin üzerinde ibkā ve iki sehmi mersûm Nikola ve bir sehmi mesfûr Hristo zimmîler uhdelerine defter-i vakf-ı şerîfe kayd ile atîk temessükleri ahz ve battalda hıfz ve her birinin hisselerine başka başka müceddeden temessük i‘tâsını istid‘â eyledikleri İstanbul Mahkemesi’nden huzûr. Fî 20 min-Muharrem sene 1242