Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 368 Hüküm no: 416 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Ebûbekir’in iki odasını Osman Çelebi b. Ahmed’e sattığı Mahmiye-i İstanbul’da Karagümrük kurbunda Ali Paşa-yı Atîk mahallesi ahâlîsinden Ahî Mustafa Çelebi b. Ebûbekir tarafından husûs-ı âti’l-beyâna vekîl olduğu mahalle-i mezkûreden İbrahim Çelebi b. Süleyman ve İmâmzâde Abdullah Çelebi b. Ahmed şehâdetleriyle şer‘an sâbit olan diğer İbrahim Çelebi b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb Osman Çelebi b. Ahmed muvâcehesinde bi’l-vekâle ikrâr ve takrîr-i kelâm edip müvekkilim mezbûr Ahî Mustafa Çelebi zikri âtî akdin sudûruna değin yedinden mülkü olup mahalle-i mezbûrda vâki‘ bir tarafdan kendi âhar mülkü ve bir tarafdan Mustafa Odabaşı menzili ve bir tarafdan semerci Mehmed Beşe menzili ve bir tarafdan tarîk-i hâs ile mahdûd ve biri birine mülâhık iki bâb müte’ehhilîn odalarını, tarafeynden îcâb ve kabûlü hâvî bey‘-i kat‘î ile merkūm Osman Çelebi’ye yüz elli esedî guruşa bi safkatin vâhidetin bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden [sonra] semeni olan meblağ-ı mezbûr yüz elli guruşu yedinden bi’t-tamâm ahz u kabz eyledi ba‘de’l-yevm zikr olunan odalar Osman Çelebi’nin mülk-i müşterâsı olmuşdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Ahmed, Yusuf Çelebi b. Receb, Mehmed Çelebi b. Ahmed, el-Hâc Yusuf b. Abdullah.