Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 368 Hüküm no: 415 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayezid Camii avlusunda et satan çeyrekçilere engel olunmaması Mahmiye-i İstanbul’da Sultan Bayezid Hân Câmi‘-i şerîfi kurbunda çeyrekçi olan kasab tâifesinden bâ‘isü hâze’l-kitâb Mustafa b. Abdülkerim nâm kimesne meclis-i şer‘-i şerîf-i enverde tâife-i merkūmeden şerîkleri Şaban b. Receb ve Kara İbrahim b. Ömer ve Musli b. Mehmed nâm kimesneler mahzarlarında takrîr-i kelâm ve ta‘bîr ani’l-merâm edip biz taşradan gelen celeb tâifesinden malımız ile koyun iştirâ edip narh-ı cârîden her lahm-ı ganemin vakıyyesini birer akçe noksân üzre câmi‘-i mezkûr havlusunda bey‘ edip ve her birimiz âharın nefsine kefîl olmağla suâl olunup kasabbaşı ve gayrılar vech-i meşrûh üzre ashâbından koyun iştirâ edip bey‘ ettiğimizde mâni‘ olunmamak üzre kıbel-i şer‘den li ecli’l-istişhâd vesîka tahrîr olunmak matlûbumuzdur dedikde gıbbe’s-suâl mezbûrlardan her biri dahi kaziyye minvâl-i meşrûh üzre olduğunu ikrâr ve her biri âharın nefsine kefîl olmağın mezbûrların ashâbından koyun iştirâ ve lühûmunun her vakıyyesini mahalle-i mezkûrede narh-ı cârîden birer akçe noksân üzre bey‘ eylediklerine mâni‘ olmamak üzre kıbel-i şer‘den işbu vesîka ketb ve terkīm olunup yedine verildi. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. [66b] Şuhûdü’l-hâl: El-Hâc ( ) b. Hüseyin, Mehmed b. Bayram, İbrahim b. Ahmed, Ali b. Mehmed.