İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 240 Hüküm no: 179 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Osman’ın, alacak davasında İstefan v. İstefan ile 5000 guruşa sulh olduğu 5000 guruşa sulh ve tecîl Ma‘rûz Medîne-i Üsküdar’da Tenbel [Hacı Mehmed] mahallesinde sâkin sahib-i arzuhâl el-Hâc Hüseyin Ağa b. Osman nâm kimesne meclis-i şer‘-i münîrde derûn-ı arzuhâlde ismi mezkûr Şerbetçi İstefan v. İstefan zimmî muvâcehesinde benim gāibân ani’l-meclis Büyük Yeni Han sarrâflarından Aci Mihal ve Aci Yorgaki veledey Todori zimmîler zimmetlerinde cihet-i karzdan alacağım olan yirmi bir bin beş yüz guruşun on iki bin guruşuyla medyûnlarım mersûmân beni ol mikdâr medyûnları mesfûr İstefan zimmî üzerine bin iki yüz otuz yedi senesi Muharreminde İstanbul’da Balat kurbünde Kara Mihal zimmî menzilinde cümlemiz bir meclisde olduğumuz hâlde havâle-i mukayyede ile havâle ve her birimiz havâle-i mezkûreyi kabûl ve ol vechile deyn-i mezkûrun ancak on iki bin guruşundan mersûmânın zimmetleri berîe olup mersûm İstefan zimmî zimmetine naklettikden sonra meblağ-ı muhâlun-bih-i mezkûr on iki bin guruşun iki bin guruşunu muhtâlün-aleyh mersûm İstefan zimmî bana edâ ve teslîm ben dahi ahz ü kabz etmemle mâ‘adâsı olan on bin guruşu dahi bi-hükmi’l-havâle mersûm İstefan zimmîden taleb ederim deyü da‘vâ eylediğimde ol dahi cevâbında husûs-ı mezkûru bi-tamamihî ikrâr ve i‘tirâf edip ancak ben havâleten deynim olan meblağ-ı merkūm on iki bin guruşun ceste ceste dokuz bin iki yüz sekiz guruşunu sana edâ edip bâkī zimmetimde ancak iki bin yedi yüz doksan iki guruş deynim kalmışdır deyü mu‘terif olduğumdan ziyâdesinde inkârıma mukārin beni def‘e tesâddî ve ol vechile beynimizde ba‘de’l-münâza‘a muslihûn tavassutuyla beynimiz ıslâh olunup ben ber-vech-i muharrer tesâddî eylediğim da‘vâmdan zimmî-i mesfûr ile bi’t-tav‘ ve’r-rızâ beş bin guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm beş bin guruş ile muahharan karz verip bâ-i‘lâm mahkûmun-bih alacağım olan iki yüz guruşdan mâ‘adâ ziyâdesine ve bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eylediğimizden sonra bedel-i sulh-ı mezkûr beş bin guruşun yüz guruşunu peşînen ve bakī dört bin dokuz yüz guruşunu dahi beher şehr yüz ellişer guruş vererek târih-i i‘lâmdan otuz dört ay hitâmına değin tamamen bana edâ ve îfâ etmek üzre rızâmla mersûm İstefan zimmîyi tecîl ve taksît eyledim deyü mukırr-ı mezbûr el-Hâc Hüseyin Ağa’nın bi’l-cümle takrîr-i meşrûhunu mersûm İstefan zimmî tasdîk ve ecel-i mezkûru ve bedel-i sulh-ı mezkûru ber-vech-i muharrer müeccelen edâya ta‘ahhüd eylediği İstanbul Mahkemesi’nden huzûr. Fî-gurreti R sene 1242