İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 238 Hüküm no: 178 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çekmece-i Sagir’deki vakıf çiftlik üzerinde Mustafa Ağa b. İbrahim ile anlaşmazlığa düşen Zeyneb Hanım’ın nizadan men edildiği Çekmece-i Sagīr’de çiftlik nizâ‘ı men‘i Ma‘rûz Nezâret-i dâ‘îlerinde olan evkāfdan İstanbul’da Mevlevîhâne Yenikapısı dâhilinde vâki‘ Evliyâ Câmi‘-i şerîfine minber vaz‘ eden ashâb-ı hayrâtdan merhûm Çiftçibaşı Mustafa Ağa Vakfı’nın bâ-berât-ı şerîf-i âlî-şân evlâdiyet ve meşrûtiyyet üzre mütevelliyesi sahibe-i arzuhâl mu‘arrefetü’z-zât Zeyneb Hatun ibnetü’l-vâkıf el-merkūm Mustafa Ağa meclis-i şer‘-i münîrde zikri âtî çiftliğe şirâen mâlik olmak üzre vaz‘-ı yedi mütehakkık olan Çekmece-i Sagīr a‘yânı Mustafa Ağa b. İbrahim muvâcehesinde zikrolunan Çekmece-i Sagīr kasabasında vâki‘ bir tarafdan Hadîce Sultân Vakfı’ndan tarla ve bir tarafdan Sultân Bâyezid-i Velî Han Vakfı’ndan tarla ve iki tarafdan tarîk-ı âm ile mahdûd bir kebîr anbâr ve bir bâb oda ve tahtında bir mağaza ve bir matbah ve bir fırın ve değirmen ve bir samanhâne ve bir öküz ahırı ve müştemilât-ı sâire-i ma‘lûmeyi hâvî bir kıt‘a mükemmel çiftlik menzili babam vâkıf-ı merhûm-ı mezbûrun vakfı iken a‘yân-ı mezbûr mülkiyet üzre zabt ve vaz‘-ı yed etmekle suâl olunup keff-i yed ve mahâllinde vakıf için bana teslîme mezbûr Mustafa Ağa’ya tenbîh olunmak bi’t-tevliye matlûbumdur deyü da‘vâ ettikde ol dahi cevâbında işbu yedimde olup meclis-i şer‘-i şerîfde mütevelliye-i mezbûre Zeyneb Hatun muvâcehesinde feth ve kırâet olunan i‘lâm ve hüccet ve senedât-ı müte‘addide-i sâirede tafsîl ve beyân ve tasrîh ve ayân kılındığı üzre çiftlik-i mezkûr mezbûr Mustafa Ağa’nın yedinde mülkü iken bin iki yüz on dört senesi şehr-i Rebî‘ülevvelinin beşinci günü zevcesi Hadîce bt. Abdullah nâm hatuna zikrolunan Çekmece-i Sagīr nâibi es-Seyyid Ömer Efendi huzûrunda bin guruş semen-i makbûza bey‘ ve temlîk ve mahâllinde teslîm ol dahi iştirâ ve temellük ve tesellüm ve kabz ve kabûl edip yedinde mülkü iken zevci merkūm Mustafa Ağa fevt oldukda mezbûre Hadîce Hatun çiftlik-i mezkûru vech-i meşrûh üzre zevci merkūm Mustafa Ağa’dan hayatında ol mikdâr semen-i medfû‘a iştirâ edip yedinde mülkü olduğunu kasaba-i mezbûrenin tâbi‘ olduğu Havâss-ı Refî‘a kazâsı nâibi müderrisîn-i kirâm-ı zevi’l-ihtirâmdan fetvâ emîni sâbık fazîletlü el-Hâc Ali Efendi tarafından husûs-ı mezkûru mahâllinde ber-nehc-i şer‘î istimâ‘ ve fasl u hasm için me’zûnen bi’l-hükm irsâl olunan Kâtibzâde Mehmed Ârif Efendi’nin kasaba-i mezbûrede müteveffâ-yı mezbûrun hayatında sâkin olduğu menzile varıp huzûr-ı Müslimînde akd eylediği meclis-i şer‘-i enverde li-eb kız karındaşı Fâtıma Hatun muvâcehesinde şühûd-ı udûlle vech-i şer‘î üzre isbât edip mûcibiyle hükm <> ve hüccet olundukdan sonra merkūme Hadîce Hatun bundan akdem zâhirde vâris-i müteveffâ olmadığı hâlde fevt ve terekesi tenfîz-i vasiyeti’çün sülüse âid ve cânib-i beytü’l-mâle râci‘ oldukda vasîyy-i muhtârı ve emîn-i beytü’l-mâl çiftlik-i merkūmu iki bin guruş semen-i makbûza gāib ani’l-meclis Süleyman Ağa b. Halil’e izn-i hâkimü’ş-şer‘le bi’l-vesâye ve bi’l-emâne bey‘ ve teslîm ol dahi ba‘de’l-iştirâ ve’t-tesellüm nısf-ı şâyi‘ini gāib ani’l-meclis es-Seyyid Mehmed Es‘ad ve nısf-ı âharını dahi oğlum gāib ani’l-meclis Mehmed Hasib nâm kimesnelere semen-i ma‘lûm ve makbûza bey‘ ve temlîk ve vech-i lâyıkı üzre teslîm onlar dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl kezâlik semen-i ma‘lûm ve makbûza bana bey‘ ve temlîk ve teslîm ben dahi iştirâ ve temellük ve tesellüm ve kabûl edip ol vechile çiftlik-i mezkûr târih-i mezbûrdan bu âna kadar yirmi sekiz sene müddetde vakf-ı mezbûrun sâbık ve lâhık mütevellîleri muvâcehelerinde tedâvül-i eydî ile sebeb-i mülk olur müstenid-i şer‘îye binâen mülkiyet üzre zabt ve tasarruf olunarak ber-vech-i muharrer şirâen mülküm olmağla bi-hakkın zabt ve vaz‘-ı yed edip hatta mezbûre Zeyneb Hatun bin iki yüz otuz dokuz senesi Recebinde mübârek rikâb-ı kamer-tâb-ı mülûkâneye takdîm eylediği arzuhâli hâmişine sâdır olan fermân-ı âlî-şâna imtisâlen Cum‘a günü Arz Odası’nda huzûr-ı hazret-i sadâret-penâhîde ol târihde Rumeli kazaskeri bulunan Pîrîzâde hafîdi semâhatlü fazîletlü sa‘âdetlü el-Hâc Yahya Beyefendi hazretlerinin akd eylediği meclis-i şer‘-i münîrde mezbûr es-Seyyid Mehmed Es‘ad ile ben oğlum mezbûrun vekîl-i şer‘îsi olduğum hâlde muvâcehemizde çiftlik-i mezkûr müteveffâ-yı mezbûr Mustafa Ağa’nın mülkü ve kendi dahi sulbiye kızı olduğundan bahisle hisse-i irsiyesini da‘vâ biz dahi ber-vech-i muharrer iştirâ eylediğimizi bast ve beyân ile def‘ ve def‘-i mezkûrumuzu kazasker-i müşârün-ileyh tarafından me’zûnen irsâl olunan Kâtib es-Seyyid Hasan Efendi’nin münâza‘un-fîh olan çiftlik-i mezkûr üzerinde akd eylediği meclis-i şer‘de şühûd-ı udûlle ber-nehc-i şer‘î isbât eylediğimiz Arz Odası’nda inhâ olunmağla mûcibince mezbûre Zeyneb Hatun da‘vâ-yı mezkûresiyle bî-vech-i şer‘î mu‘ârazadan men‘ olunduğu kazasker-i müşârün-ileyh hazretleri huzûr-ı âlîye i‘lâm etmekle i‘lâm-ı mezkûr rikâb-ı hümâyûn-ı mülûkâneye lede’l-arz meşmûl-i lihâza-i mekârim-ifâza-i hazret-i pâdişâhî olmuş ve husûs-ı mezkûr şer‘le rü’yet olunup bitmiş olmağla mûcibince amel olunmak bâbında sahh-ı âlî ile müveşşah fermân-ı âlî-şân sâdır olmuşdu deyü eylediği takrîrini ve ber-vech-i muharrer mülkiyet üzre hisse da‘vâ eylediğini ve bu âna kadar mülk olmak üzre tedâvül-i eydî ile zabt ve tasarruf olunageldiğini mütevelliye-i müdde‘iyye-i mezbûre Zeyneb Hatun tasdîk eylediğinden mâ‘adâ vakfiyet müdde‘âsını vech-i şer‘î üzre tashîh ve beyân edememekle bu sûretde ber-muktezâ-yı şerî‘at-i garrâ bu mertebe ile tesâddî eylediği da‘vâsı mesmû‘a olmadığı mütevelliye-i mezbûre Zeyneb Hatun’a tefhîm olunduğu İstanbul Mahkemesi’nden huzûr. Fî 16 Ca sene 1242 Mukābele-şüd