İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 242 Hüküm no: 182 Orijinal metin no: [37b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asiye Hatun’un, Yakub Ağa mahallesi’ndeki vakıf evdeki hissesini Fâtıma Hatun bt. Ahmed’e devrettiği Vakıf nısf menzil ferâğı der-mahalle-i Yakub Ağa Ma‘rûz Sahibe-i arzuhâl Asiye Hatun bt. el-Hâc Mehmed b. Abdullah tarafından husûs-ı âtîde vekîl-i müseccel-i şer‘îsi İsmail Efendi b. el-Hâc Mustafa meclis-i şer‘-i münîrde mukaddemâ müvekkile-i mezbûre Asiye Hatun’un darrası? zâtı mu‘arrefe Fâtıma Hatun bt. Ahmed muvâcehesinde defterdâr-ı şıkk-ı evvel izzetlü efendi bendeleri nezâretlerinde âsûde defterdâr-ı esbak-ı merhûm el-Hâc İbrahim Efendi Vakfı’nın bi’l-meşrûta mütevelliyesi mâlikâne halîfesi kız karındaşı Âişe Hanım tarafından vekîl olduğu zât-ı mûmâ-ileyhâyı ârifân Hâfız Feyzullah Efendi b. Mehmed ve Ferhad Ağa b. Abdullah nâm kimesneler şehâdetleriyle sâbit olan câbî-i vakf el-Hâc Hamza Ağa b. Ali hazır olduğu hâlde yedimde olup bin iki yüz otuz altı senesi Cumâdelûlâsı’nın üçüncü günü târihiyle müverrah ol târihde İstanbul kādısı bulunan nakībü’l-eşrâf-ı esbak-ı merhûm es-Seyyid Mehmed Ebulhayr Efendi’nin hatmiyle mahtûm bir kıt‘a i‘lâm-ı şer‘îde tafsîl ve beyân olunduğu üzre vakf-ı mezbûr müsakkafâtından İstanbul’da Yakub Ağa mahallesinde kâin bir tarafdan Paşalıoğlu Mehmed Ağa menzili ve bir tarafdan Lâleli Müezzini İsmail Efendi menzili ve bir tarafdan bostan ve taraf-ı râbi‘i tarîk-ı âm ile mahdûd beher şehr kırk beş akçe icâre-i müecceleli bir bâb menzilin nısfı müvekkilem mezbûrenin ve nısf-ı âharı dahi zevci Dîvân-ı hümâyûn çavuşlarından el-Hâc Ahmed Ağa b. el-Hâc Mehmed’in tasarrufunda iken müvekkile-i mezbûre nısf hisse-i mezkûresini iki yüz yirmi beş senesi şehr-i Rebî‘ülevvelin yirmi birinci günü olunca kendini gözetmek şartıyla Karamürsel ahâlîsinden Çorbacıoğlu el-Hâc Mehmed Ağa b. Süleyman’a ferâğ edip ol dahi şart-ı mezkûr ile tefevvüz ve kabûl ve ba‘dehû fevt olup oğlu Mehmed Ali ve kızı Emine’yi terk ettikden sonra mezbûr Mehmed Ali ber-takrîb hud‘a ile Çorbacıoğlu el-Hâc Mehmed Ağa hayatdadır diyerek ber-takrîb nısf-ı menzil-i mezkûru zevci mezbûr el-Hâc Ahmed Ağa üzerine geçirip lâkin müvekkilem mezbûre vech-i muharrer üzre nısf-ı menzil-i mezkûru müteveffâ-yı mezbûr Çorbacıoğlu el-Hâc Mehmed Ağa’ya hayatında şartla ferâğını kādı-i mûmâ-ileyh huzûrunda mezbûr Mehmed Ali ile mezbûre Emine’nin zevci ve vekîl-i müsbeti İbrahim b. Mehmed muvâcehelerinde zevci merkūm el-Hâc Ahmed Ağa hazır olduğu hâlde şühûd-ı udûlle ba‘de’l-isbât nısf-ı menzil-i mezkûrdan merkūmûnun keff-i yedleri ve mezbûrenin tasarrufu iktizâ eylediğini kādı-i merhûm-ı mûmâ-ileyh i‘lâm etmekle i‘lâmı mûcibince nısf-ı menzil-i mezkûru müvekkile-i mezbûre re’y-i mütevellî ile kemâ-fi’s-sâbık zabt ve tasarruf etmişdi el-hâletü hâzihî müvekkile-i mezbûrenin mutasarrıfe olduğu nısf-ı menzil-i mezkûru hüsn-i rızâ ve tayyib-i hâtırı ve ferâğ-ı mu‘teber-i kat‘î ile beş yüz guruş bedel-i makbûz ve müstehlek mukābelesinde bâ-re’y-i mütevellî mezbûre Fâtıma Hatun’a bi’l-vekâle ferâğ ve tefvîz ve vech-i lâyıkı üzre teslîm eylediğimde ol dahi ber-vech-i muharrer tefevvüz ve kabûl edip fîmâ-ba‘d nısf-ı menzil-i mezkûr mezbûre Fâtıma Hatun’un dâhil-i havza-i tasarrufu olup müvekkilem mezbûrenin kat‘a alâka ve medhali kalmamağla bi’l-cümle husûs-ı mezkûra ve ferâğ-ı mezbûrda şurût-ı fâside müdde‘âsına ve bedel-i müstehlek-i merkūmun istirdâdına müte‘allika da‘vâdan tarafeynden her birimiz âharın zimmetini [38a] bi’l-asâle ve bi’l-vekâle kabûlü hâvî ibrâ ve ıskāt eyledik deyü vekîl-i mezbûrun bi’l-cümle takrîrini mezbûre Fâtıma Hatun tasdîk eylediği İstanbul Mahkemesi’nden huzûr-ı âlîlerine i‘lâm olundu el-emrü li-veliyyü’l-emr. Fî 19 min-Ca sene 1242