Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 369 Hüküm no: 418 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahbaz bt. Abdullah’ın buğdayına el koyulduğu iddiasını ispatlayamadığı Mahrûse-i Galata’ya tâbi‘ kasaba-i Kasımpaşa’da Piyâle Paşa mahallesinde sâkine olup zâtını ma‘rifet-i şer‘iyye ile ârifân olan Süleyman b. Abdullah ve İsmail b. Mehmed nâm kimesneler ta‘rîfleriyle mu‘arrefe olan Şahbaz bt. Abdullah nâm hâtun meclis-i şer‘-i şerîfde bâ‘isü hâze’l-kitâb Şaban b. Ali nâm kimesne mahzarında üzerine da‘vâ ve takrîr-i kelâm edip zevcim olup mahrûse-i mezbûreye tâbi‘ Bandırma nâm mahalde vâki‘ altmış keyl buğdayını fuzûlî kabz ve âhara bey‘ ile istihlâk etmeğin merkūm Şaban’a suâl olunup zikr olunan altmış keyl buğdayın hâlâ misl-i şer‘îsinin alıverilmesi matlûbumdur dedikde gıbbe’s-suâl mezbûr inkâr edicek müdde‘iye-i merkūme Şahbaz’dan da‘vâsına mutâbık beyyine taleb olundukda ityân-ı beyyineden izhâr-ı acz etmeğin istihlâf olundukda merkūm Şaban ber vech-i muharrer müteveffâ-yı mezbûr Kenan’ın eşyâsından mârrü’z-zikr Bandırma nâm mahalde vâki‘ altmış keyl buğdayı fuzûlî ahz u kabz ve âhara bey‘ ile istihlâk etmediğine ve ol vechile müdde‘iye-i mezbûrenin zimmetinde hakkı kalmadığına yemîn teklîf ol dahi alâ vefki’l-mes’ûl yemîn etmeğin mûcebince müdde‘iye-i mezbûre Şahbaz Hâtun bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâdis [min Şa‘bâni’l-mu‘azzam] li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İsmail Çelebi b. Mehmed, Süleyman b. Abdullah, Mehmed b. İdris Çavuş.