Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 370 Hüküm no: 419 Orijinal metin no: [66b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhad v. Manas adlı Ermeni’nin Habeşli Yusuf Vakfı’na borcu olduğu Ashâb-ı hayrâtdan merhûm Habeşli? Yusuf vakfına mütevellî olan işbu bâ‘isü’l-kitâb imâm Abdullah Efendi b. Hasan meclis-i şer‘-i şerîf-i enverde mahmiye-i İstanbul’da Topkapısı kurbunda sâkin Ferhad v. Manas nâm Ermeni muvâcehesinde üzerine da‘vâ ve takrîr-i kelâm edip mezbûr Ferhad zimmetinde mütevellîsi olduğum mâl-ı vakf-ı mezbûrdan mukaddemâ [67a] istidâne ve kabz eylediği ba‘de küllî hesâb seksen yedi esedî guruş deyni olup hâlâ taleb eylediğimde bana edâdan imtinâ‘ eder suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Ferhad cevâbında fi’l-hakīka müdde‘î-i mezbûrun bâlâda ketb ü tahrîr olunan minvâl üzre yedinden istidâne ve kabz eylediğim ba‘de külli’l-hesâb seksen yedi esedî guruş vakf-ı mezbûra [lâzımü’l]-edâ vâcibü’l-kazâ deynimdir deyû bi’t-tav‘i’s-sâf ikrâr ve i‘tirâf etmeğin alâ mûcebi i‘tirâfihî meblağ-ı mezbûr seksen yedi esedî guruşu müdde‘î-i mezbûr vakf için edâ ve teslîm mezbûr Ferhad’a tenbîh olunup mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, el-Hâc Mustafa b. Tevekkül, İbrahim Çelebi b. Ahmed, Mehmed b. İdris.