İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 268 Hüküm no: 210 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tönbekici Kukas v. Artin’in, kardeşi Avanes v. Artin’e borcunu ödediği 1000 guruşa sulh ve bedel-i sulhü tamamen ahz ü ibrâ Nüshateyn Ma‘rûz İşbu arzuhâle merbût diğer arzuhâl sahibi sarrâf tâifesinden Eğinli Avanes v. Artin zimmî Çarşamba günü Arz Odası’nda huzûr-ı fâizü’n-nûr-ı sadâret-penâhîlerinde ma‘kūd meclis-i şer‘-i münîrde li-ebeveyn er karındaşı olup işbu arzuhâl sahibi Tönbekici Kukas veledi’l-mersûm Artin zimmî muvâcehesinde karındaşım mersûm Kukas zimmî ile mukaddemâ şerîkler olup ba‘dehû fesh-i akd-i şirket-birle hesâbımızı lede’r-ru’ye benim mersûmun zimmetinde mal-ı şirketden alacağım zuhûr eden bin yüz on bir guruş ve cihet-i karzdan dahi iki bin guruş ki cem‘an üç bin yüz on bir guruşu mersûmdan hâlâ taleb ederim deyü tesâddî eylediğim da‘vâmdan bâ-tavassut-ı muslihîn karındaşım mersûm ile bi’t-tav‘ ve’r-rızâ bin guruşa an-inkâr sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm bin guruşdan mâ‘adâ bi’l-cümle husûs-ı mezkûrlara ve ziyâde müdde‘âma ve hukūk-ı şirkete ve hesâbda galat vukū‘una ve sâir beynimizde cereyân eden cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik deyü mukırr-ı mersûm Avanes zimmînin bi’l-cümle takrîr-i meşrûhunu karındaşı mesfûr Kukas zimmî tasdîk eyledikden sonra mersûm Kukas zimmî ibrâdan müstesnâ bedel-i sulh-ı merkūm bin guruşu dâ‘îhânelerinde ma‘kūd meclis-i şer‘-i şerîf-i enverde karındaşı müdde‘î-i mesfûr Avanes zimmîye tamamen def‘ ü teslîm ol dahi ahz ü kabz ve istifâ-yı hak ile fîmâ-ba‘d tarafeynden her birinin âhar zimmetinde kat‘a <> hakkı kalmadığını ikrâr ve i‘tirâf ve bu vechile külliyen kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 9 C sene 1242