İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 270 Hüküm no: 212 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Osman’ın, Hristo zimmîden boş kalan vakıf kasab gediğini kiraladığı Mahlûlden kasab gediği îcârı Yedikule kassâbânı kethudâsı el-Hâc Hasan Ağa b. el-Hâc Osman nâm kimesne meclis-i şer‘-i enverde hudâvendigâr-ı esbak cennet-mekân firdevs-âşiyân merhûm mağfiret-nişân Sultân Abdülhamid Han -tâbe serâhu- hazretlerinin evkāf-ı şerîfeleri kāimmakām-ı mütevellîsi e‘âzım-ı ricâl-i Devlet-i Aliyye’den hâlâ evkāf-ı hümâyûn nâzırı sa‘âdetlü el-Hâc Yusuf Efendi tarafından mürsel İsmail Ağa b. Mustafa nâm kimesne muvâcehesinde takrîr-i kelâm edip vakf-ı müşârün-ileyh mülhakātından Yedikule hâricinde kâin gayrı-ez selhhâne-i mîrî on aded ganem selhhânelerinden dördüncü selhhâneye merbût kasab dükkânlarından İstanbul’da Tavuk Pazarı’nda Osmâniye Câmi‘-i şerîfi köşesinde el-Hâc Osman Ağa b. el-Hâc Ali’nin kasab dükkânı ittisâlinde kâin bir bâb kasab dükkânı derûnunda mevcûde vakıf âlât-ı lâzıme-i ma‘lûmeye bâ-temessük-i mütevellî müstakillen mutasarrıf olan Hristo zimmî bundan akdem bilâ-veled hâlik olup âlât-ı lâzıme-i mezkûre mahlûl ve cânib-i vakf-ı şerîfe âid ve râci‘ oldukda âlât-ı gedik-i mezkûr sûk-ı sultânîde lede’l-müzâyede ve’l-inkıtâ‘ı’r-rağbe yüz guruşda benim üzerimde karâr ve ziyâde ile tâlib-i âharı zuhûr etmeyip ve meblağ-ı mezbûr gedik-i mezkûrun el-yevm mu‘accele-i misli idüğü bi’l-ihbâr zâhir olmağın kāimmakām-ı mûmâ-ileyh gedik-i mezkûru meblağ-ı merkūm yüz guruş mu‘accele ve müeccele-i kadîmesiyle bana îcâr ve teslîm ben dahi istîcâr ve kabûl ve meblağ-ı mezbûru kendüye teslîm ve umûr-ı vakf-ı şerîfe sarfla istihlâke emretmemle ol dahi yedimden kabz ve emrimle umûr-ı vakfa sarfla ba‘de’l-istihlâk fîmâ-ba‘d mu‘accele-i mezkûrenin adem-i istifâsına müte‘allika âmme-i da‘vâdan [43a] kāimmakām-ı mûmâ-ileyhin zimmetlerini ibrâ-i âm ile kabûllerini hâvî ibrâ ve ıskāt eyledim deyü ba‘de’l-ikrâr ve’t-tasdîk gedik-i mezkûr hâlik-i mersûmun mahlûlünden kethudâ-yı mersûm el-Hâc Hasan Ağa üzerine defter-i vakf-ı şerîfe ba‘de’l-kayd yedine müceddeden bir kıt‘a temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî 29 Ra sene 1242