İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 272 Hüküm no: 214 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müfsid Artin v. Karabet’in, horasancı esnafının şikâyetleri neticesinde memleketi Sivas’a sürgüne gönderildiği Horasancı müfsid Artin zimmîyi vatan-ı aslîsine nefy ve iclâ Ma‘rûz Fi’l-asl Sivas re‘âyâsından Artin v. Karabet nâm zimmî lisânen sâdır olan fermân-ı cihân-mutâ‘larına imtisâlen Çarşamba günü Arz Odası’nda huzûr-ı ma‘rifet-nüşûr-ı düstûrânelerinde ma‘kūd meclis-i şer‘-i münîrde Âsitâne-i aliyye ve bilâd-ı selâsede kâin horasancı esnâfının kâhyaları İsayi ve yiğitbaşısı Artin ve esnâfından Kirkor ve Zeron ve Kasber ve Bogos ve Maniyel ve Agop ve Asvador ve Haçador ve Artin ve diğer Haçador zimmîler ve sâirleri muvâcehelerinde ben el-hâletü hâzihî çizmeci esnâfından olup horasancılıkda mahâret ve alâkam yoğise de babam horasancı esnâfından olduğuna binâen Kumkapı kurbünde bir bâb horasancı kârhânesi küşâd ve ihdâs murâd eylediğimde esnâf-ı merkūme mümâna‘at etmeleriyle mümâna‘atları men‘ olunmak murâdımdır dedikde onlar dahi cevâblarında İstanbul ve bilâd-ı selâsede vâki‘ horasancı kârhâneleri ma‘dûden Başmuhâsebe’de mukayyed ve taht-ı nizâma dâhil olduğundan mâ‘adâ mersûm Artin zimmî müfsid Artin denmekle meşhûr olarak bu âna kadar beş nev‘ esnâfa duhûl etmiş ise de her birini bir gûne tezvîr ile ifsâd eylediğinden cümlesi dahi bâ-i‘lâm içlerinden tard ve def‘ edip hatta birkaç def‘a dahi hilâf-ı rızâ-yı âlî hareketi vukū‘una mebnî bâ-emr-i âlî bilâd-ı ba‘îdeye nefy ve ba‘dehû o makūle ifsâd ve tezvîrde bulunmamak şartıyla ıtlâk olunmuş olmağla esnâfımıza dahi duhûl eylediği hâlde şurût-ı nizâmımızın ihtilâl ve izmihlâline bâ‘is ve envâ‘-ı tezvîr ve fesâda mütecâsir olacağı bedîhî ve âşikâr olmağla zimmî-i mesfûrdan bir vechile emniyetimiz yokdur deyü bi’l-muvâcehe sû’-i hâlini ihbâr ile iştikâ etmeleriyle mersûmun hâli esnâf-ı merkūmenin tıbk-ı takrîrleri üzre olduğu tahkīk olunduğundan gayrı huzûr-ı âsafânelerinde kable’s-suâl bî-edebâne cesâret eylediği harekât ve hezeyânından tezvîri zâhir oldukda def‘an li’l-fesâd mersûm Artin vatan-ı aslîsine nefy ve iclâ buyurulup külliyen kat‘-ı nizâ‘ olunduğu hıfzan li’l-makāl bi’l-iltimâs İstanbul Mahkemesi’nde tescîl kılındığı huzûr. Fî 14 Ca sene 1242