İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 289 Hüküm no: 233 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Sinanüddin Ağa Zaviyesi’nden mahallelinin şikâyeti ile şeyh ihracı ve yerine Mustafa Efendi’nin tayini Zâviyeden şeyh ihrâcı ve meşîhati âhara ferâğla kaleminden berat-ı şerîf istid‘âsını hâvî Ma‘rûz İstanbul’da Ebulfeth Sultân Mehmed Han -tâbe serâhu- Hazretleri Câmi‘-i şerîfi nezdinde vâki‘ Âşık Paşa mahallesi imâmı Hâfız Mehmed Efendi ve müezzini es-Seyyid Mustafa Efendi ve ahâlîsinden Mehmed Rüstem Efendi ve Hammâmî İsmail Ağa ve Çukadâr Ali Ağa ve Kapanî İsmail Ağa ve Haffâf Hüseyin Ağa ve Kaşıkçı Osman Ağa ve Reis İbrahim Ağa ve Yemenîci Ahmed Ağa ve Kahveci Abdullah Ağa ve Papuşcu Mehmed Ağa ve Turşucu Ali Ağa ve Destereci Ali Ağa ve Yufkacı Veliyüddin Ağa ve Kundakçı Abdülgani Ağa ve Zeytinci Hüseyin Ağa ve Şerbetçi el-Hâc Ahmed Ağa ve Yemenîci İbrahim Ağa ve Tatar Mustafa Ağa ve Magunacı [Mavnacı] Osman ve Saka Ali ve Culha Osman nâm kimesneler ve sâirleri bâ-işâret-i aliyye-i bâhiretü’l-bişâre hazret-i şeyhülislâm-ı sellemehü’s-selâmî sâdır olan fermân-ı cihân-mutâ‘-ı vâcibü’l-ittibâ‘larına imtisâlen bi’t-terâzî dâ‘îhânelerinde husûs-ı mezkûru bi’l-ma‘iyye istimâ‘a me’mûr nezâret-i hazret-i vekâlet-penâhîlerinde âsûde evkāf müfettişi mevâlî-i ızâmdan fazîletlü es-Seyyid Ahmed Efendi dâ‘îleri ma‘iyyetle akd olan meclis-i şer‘-i münîrde nezâret-i âsafânelerinde olan evkāfdan mahalle-i mezbûrede kâin mi‘mâr-ı sultânî merhûm Yusuf Sinanüddîn Ağa Zâviyesi’nin yevmî dört akçe vazîfe ile meşîhat cihetine bâ-berât-ı âlî mutasarrıf olan es-Seyyid Ali ibnü’l-merhûm es-Seyyid eş-Şeyh Hâfız Mehmed Efendi muvâcehesinde zâviye-i mezbûreye mutasarrıf olan hulefâ-i tarîkat-i aliyye-i Nakşibendiye’den babası mezbûr Şeyh Hâfız Mehmed Efendi bundan akdem fevt oldukda oğlu merkūm es-Seyyid Ali bir-takrîb üzerine tevcîh ve berat ettirip lâkin câhil ve füyûzât-ı tarîkat-i aliyyeden bî-behre ve nâ-ehil olduğundan mâ‘adâ ben tarîkat-i Bedeviyye’ye müntesibim diyerek zâviye-i mezkûreye birtakım mechûlü’l-ahvâl ricâl ve nisâyı cem‘le hilâf-ı şer‘-i şerîf ve mugāyir-i erkân-ı tarîk harekât-ı nâ-merzıyyeye ictisâr ve âhar vechile dahi hilâf-ı rızâ hareketi nümûdâr olduğundan asla emniyetimiz kalmamağla zâviye-i mezbûreyi erbâb-ı istihkākdan birine kasr-ı yed ile kendi mahallemizden def‘ ü teb‘îd buyurulmak niyâzımızdır deyü muvâcehesinde sû’-i hâlini inhâ ile iştikâ eylediklerinde sâye-i merhamet-vâye-i cenâb-ı hilâfet-penâhîde cemî‘ sekene-i Dârü’l-hilâfeti’l-aliyyenin bu misillü insilâb-ı emniyetleri hilâf-ı rızâ-yı dâverâneleri olmağla zâviye-i mezbûreyi müstahıkkīnden bir kimesneye kasr-ı yed ile mahalle-i mezbûreden teba‘ud eylemesi hakkında her vechile mûcib-i hayr olacağı mezbûr es-Seyyid Ali’ye tefhîm olundukdan sonra merkūm es-Seyyid Ali def‘a-i sâniyede müfettiş-i mûmâ-ileyh tarafından me’zûn es-Seyyid Mehmed Es‘ad Efendi ile dâ‘îhânelerinde ma‘kūd meclis-i şer‘-i hatîrde tarîkat-i Nakşibendiye’den es-Seyyid eş-Şeyh Mustafa Efendi b. es-Seyyid Mehmed muvâcehesinde ahâlî-i merkūmûn hazır oldukları hâlde takrîr-i kelâm edip ben ber-vech-i muharrer mutasarrıf olduğum meşîhat-i zâviye-i mezkûreyi hüsn-i rızâ ve ihtiyârım ile merkūm es-Seyyid eş-Şeyh Mustafa Efendi’ye ferâğ ve kasr-ı yed ve kendim âhar mahalleye nakle ta‘ahhüd eyledim deyü takrîrini merkūm es-Seyyid eş-Şeyh Mustafa Efendi tasdîk edip ahâlî-i merkūmûn dahi râzılar olmalarıyla bu sûretde meşîhat-i mezkûre fâriğ-i mezbûrun kasr-ı yedinden vazîfe-i mersûmesiyle merkūm es-Seyyid eş-Şeyh Mustafa Efendi’ye tevcîh ve kaleminden yedine berat-ı şerîf-i âlî-şân inâyet ve ihsân buyurulmak iktizâ eylediği İstanbul Mahkemesi’nden huzûr. Fî 25 C sene 1242