İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 289 Hüküm no: 232 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. Yaki’nin, kazzaz gediğini Yorgaki v. Dimitri’ye sattığı Kazzâz mübâya‘ası Ma‘rûz Âsitâne-i aliyyede kazzâz esnâfından Yuvan v. Yani zimmî meclis-i şer‘-i münîrde esnâf-ı merkūmeden Yorgaki v. Dimitri zimmî muvâcehesinde kethudâları Abdüllatif Ağa tarafından mürsel yiğitbaşı Molla Mehmed hazır olduğu hâlde İstanbul’da bezzâzistân-ı atîk civârında Çakır Ağa zukāğında Gaytan oğlu Dimitri ve Merkeryos zimmîler dükkânları beynlerinde kâin bir bâb kazzâz dükkânı derûnunda mevcûde Başmuhâsebe’de mukayyed ve mu‘teber gedik ta‘bîr olunur bâ-sûret şirâen mâlik olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Yorgaki zimmîye iki bin dört yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mesfûr Yorgaki zimmînin mülk-i müşterâsı ve hakk-ı sırfı olup benim asla ve kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun kaydı bâyi‘-i mersûm üzerinden ref‘ ve terkīn ve müşteri-i mesfûr ismine tashîhan kayd ve sûret-i atîki battalda hıfz ile kaleminden yedine müceddeden bir kıt‘a sûret i‘tâ olunmasını istid‘â eyledikleri İstanbul Mahkemesi’nden huzûr. Fî 29 C sene [1]242