İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 291 Hüküm no: 235 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsrail v. İsak’ın, kazzaz gediğini İsak v. Mosi’ye sattığı Kazzâz mübâya‘ası Ma‘rûz Kazzâz esnâfından İsrail v. İsak nâm <> Yahûdî meclis-i şer‘-i münîrde esnâf-ı merkūmeden İsak v. Mosi nâm Yahûdî muvâcehesinde kethudâları Abdüllatif Ağa tarafından mürsel yiğitbaşı Molla Mehmed hazır olduğu hâlde İstanbul’da Çarşı-yı Kebîr’de Takyeciler sûkunda kâin Başmuhâsebe’de mukayyed bir bâb kazzâz dükkânı derûnunda mevcûde gedik ta‘bîr olunur bâ-sûret mâlik olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin guruş semen-i makbûza mersûm İsak Yahûdiye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mersûm İsak Yahûdinin mülk-i müşterâsı ve hakk-ı sırfı olup benim alâkam kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûmun ismine olan kaydı ref‘ ve terkīn ve müşteri-i mersûmun ismine tashîhan kayd ile yedine sûret i‘tâsını istid‘â eyledikleri İstanbul Mahkemesi’nden huzûr. Fî-gurreti B sene 1242