İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 291 Hüküm no: 236 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moralı oğlu Elez üzerine kayıtlı olan kazzaz gediğinin, Hazerosi v. Serab üzerine tashihi Kazzâz gediği ismine tashîhan kaydını istid‘â Ma‘rûz Âsitâne-i aliyyede vâki‘ kazzâz esnâfından Hazerosi v. Serab zimmî meclis-i şer‘-i münîrde esnâf-ı merkūme kethudâsı Abdüllatif Ağa ve yiğitbaşı Molla Mehmed ve sâir nizâm ustaları hazır oldukları hâlde İstanbul’da Uzun Çarşı’da Kebeciler Hânı sûkunda Kilid Hânı karşısında Kîseci Takfor ve Kolancı Sahak zimmîler dükkânları beynlerinde kâin bir bâb kazzâz dükkânı derûnunda mevcûde gedik ta‘bîr olunur Başmuhâsebe’de mukayyed ve şurût-ı nizâma dâhil ve mu‘teber âlât-ı lâzıme-i ma‘lûme Moralı oğlu Elez Yahûdinin bâ-sûret yedinde mâlı iken hâlik olup sulbî kebîr oğlu Yaşova Yahûdiye hasran mevrûs oldukdan sonra mersûm Yaşova Yahûdî gedik-i mezkûru semen-i ma‘lûm ve makbûza bi’l-verâse el-Hâc Mehmed Ziyâdî b. Ramazan nâm kimesneye bâ-hüccet bey‘ ve teslîm ol dahi ba‘de’l-iştirâ ve’t-tesellüm kezâlik semen-i ma‘lûm ve makbûza bana bey‘ ve teslîm ben dahi iştirâ ve tesellüm etmemle ol vechile gedik-i mezkûr el-yevm bâ-hüccet şirâen mâlım olup lâkin yedimde sûret olmamağla kaleminde sahib-i evveli mersûm Elez Yahûdî ismine olan kaydı ref‘ ve terkīn ve ismime tashîhan kayd ile yedime müceddeden bir kıt‘a sûret i‘tâ buyurulması niyâzımdır deyü istirhâm ve istid‘â ve fi’l-vâki‘ kaleminde mersûm Moralı oğlu Elez Yahûdî ismine mukayyed olan kazzâz gediği işbu gedik olup bâlâda tafsîl olunduğu vech üzre ırsen ve şirâen tedâvül-i eydî bulunarak el-yevm mersûm Hazerosi zimmînin bâ-hüccet-i şer‘iye mâlı olduğunu ve bu makūle mukayyed kazzâz gediklerinin kapan-ı evveline ta‘arruz olunmayarak tedâvül-i eydî ile muahharan mâlik olanların istid‘âlarıyla bâ-i‘lâm ve bâ-fermân-ı âlî isimlerine tashîhan kayd ve sûret-i atîki zuhûr eder ise amel ve i‘tibâr olunmamak şartıyla yedlerine müceddeden sûret i‘tâsı şurût-ı nizâmlarından idüğünü esnâf-ı hâzırûn-ı merkūmûn ihbâr ve inhâ etmeleriyle bu sûretde istid‘âsı şurût-ı nizâma muvâfık olduğu ma‘lûm-ı devletleri buyruldukda ber-mûcib-i şurût-ı nizâm istid‘âsına müsâ‘ade-i seniyyeleri erzânî buyurulup gedik-i mezkûrun sahib-i evveli mersûm Elez Yahûdî ismine olan kaydı kaleminden ref‘ ve terkīn ve el-yevm mâlik idüğü bâ-hüccet ve bâ-ihbâr zâhir olan mersûm Hazerosi zimmî ismine tashîhan kayd ile sûret-i atîki zuhûr eder ise amel ve i‘tibâr olunmamak şartıyla yedine müceddeden sûret i‘tâsı bâbında fermân-ı âlîleri sudûru muktezâ-yı şurût-ı nizâm eylediği İstanbul Mahkemesi’nden huzûr. Fî 2 B sene 1242