İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 293 Hüküm no: 238 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kırımî Mehmed Said Ağa b. Musa’nın, borcunun 5808 guruşunun terekesinden ödenip kalanının affedildiği 5808 guruşu dâyinleri kabz ve mâ‘adâlarından ibrâ Ma‘rûz Sâdır olan fermân-ı âlîlerine imtisâlen zikri câ’î husûsu lâzım olanları celb ve tahkīk ederek şer‘le istimâ‘ için taraf-ı dâ‘iyânemden me’zûnen irsâl olunan Mevlânâ es-Seyyid Salih Afîf Efendi dâ‘îleri mahrûse-i Galata Yağkapanı’nda vâki‘ nâzır odasına varıp hâlâ kapan-ı merkūm nâzırı Süleyman Ağa ve tüccârından lâzım olanları celb ile ba‘de’t-tahkīk akd-i meclis-i şer‘-i âlî ettikde kapan-ı merkūm tüccârından olup bundan akdem fevt olan Kırımî Mehmed Said Ağa b. Musa’nın verâseti zevce-i metrûkesi Hadîce Hatun bt. el-Hâc Rasul ile vâlidesi Hanife bt. Mehmed’in li-ebeveyn kız karındaşı Rahime bt. Ömer’in sadrî kebîr oğulları sahib-i arzuhâl Kırımî Mücellid Ahmed Efendi ve Mehmed Efendi’ye münhasıra ba‘dehû zevce-i mezbûre Hadîce Hatun dahi vefât edip verâseti ancak li-ebeveyn er karındaşı Mahmud Efendi’ye münhasıra oldukdan sonra müteveffâ-yı mezbûrun terekesi cânib-i mîrîden zabt ve ba‘dehû ma‘lûmü’l-mikdâr bedel-i muhallefât ile ashâb-ı düyûnunu irzâ ve iskât şartıyla bâ-sûret veresesi merkūmûna terk olunduğuna binâen ashâb-ı hukūkdan olup tütün semeninden bâkī bin dört yüz otuz beş buçuk guruş alacağının dokuz yüz elli guruşunu ahz ve mâ‘adâ dokuz yüz seksen beş buçuk guruşdan ibrâ eden Tütüncü Kemahlı Ömer Ağa b. Mehmed ve bâ-defter eşyâ-i ma‘lûme semeninden iki yüz elli dokuz guruş alacağının yüz yirmi beş guruşunu ahz ve mâ‘adâ yüz otuz dört guruşundan ibrâ eden Cezayirli es-Seyyid Mehmed Hoca b. el-Hâc Hüseyin ve pirinç semeninden bâkī yüz on <>guruş alacağının elli guruşunu ahz ve mâ‘adâ altmış guruşundan ibrâ eden Pirinççi Hasan Efendi b. Mehmed ve bâ-defter eşyâ-i ma‘lûme semeninden bâkī doksan beş guruş alacağının elli guruşunu ahz ve mâ‘adâ kırk beş guruşundan ibrâ eden Hamalbaşı Hüseyin Ağa b. Abdullah ve eylediği hizmetinin müddet-i ma‘lûmede ecr-i müsemmâsından bâkī altı yüz altmış iki guruş alacağının yüz elli guruşunu ahz ve iki yüz on iki guruşunu dahi zimmetinde deyni olan ol mikdâr guruşa mahsûb ve mâ‘adâ üç yüz guruşdan ibrâ eden Kırımî Abdülfettah Yazıcı b. es-Seyyid Ahmed nâm kimesne ile nısf hisse martiko nâm kayık semeninden bâkī sekiz yüz guruş alacağının üç yüz elli guruşunu ahz ve mâ‘adâ dört yüz elli guruşundan ibrâ eden Kazzâz Aci Artin v. Kigork zimmîden her biri asâleten ve cihet-i şirketden beş bin dokuz yüz dokuz guruş alacağının dört bin guruşunu ahz ve mâ‘adâ bin dokuz yüz dokuz guruşundan ibrâ eden Emir Ali b. Süleyman b. Abdullah tarafından ber-vech-i muharrer taleb ve da‘vâ ve ahz ü kabz ve lede’l-iktizâ sulh ve ibrâya ve makbûzunu kendüye irsâl ve îsâle ve bunlar mütevakkıf olduğu umûrun küllîsine vekâlet-i âmme-i mutlaka ile vekîl olduğu lede’t-tezkiye adl ve makbûlü’ş-şehâde idükleri ihbâr olunan Kırımî Osman Ağa b. Eyüb ve es-Seyyid İbrahim Ağa b. es-Seyyid Mehmed nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan es-Seyyid Selâmet Ağa b. Mehmed ve penbe ipekli semeninden iki yüz otuz üç buçuk guruş alacağının yüz otuz üç buçuk guruşunu ahz ve mâ‘adâ yüz guruşundan ibrâ eden İpekçi Kartallı Yorgaki ve Lusitiri zimmî tarafından husûs-ı âtîde vekîl-i müseccel-i şer‘îsi Nikola v. Atam zimmîler vekâleten meclis-i ma‘kūd-ı mezkûrda verese-i merkūmûndan mezbûr Mahmud Efendi ile kendi nefsinden asîl ve li-ebeveyn karındaşı merkūm Mehmed Efendi tarafından vekîl-i müseccel-i şer‘îsi mezbûr Ahmed Efendi muvâcehelerinde her biri bi’l-asâle ve bi’l-vekâle takrîr-i kelâm edip müteveffâ-yı mezbûrun düyûnu terk olunan terekesinden ezyed olduğundan mâ‘adâ bizim ber-nehc-i şer‘î isbât ve tahlîfe iktidârımız olmamağla [47b] nâzır ve tüccâr-ı merkūmûn tavassutlarıyla beynimiz ıslâh olunup verese-i merkūmûn alacaklarımızdan bâlâda tafsîl olunduğu üzre min-haysü’l-mecmû‘ beş bin sekiz yüz sekiz guruşunu bize def‘ ü teslîm biz dahi ahz ü kabz etmemizle mâ‘adâlarına ve bi’l-cümle husûs-ı mezkûra ve hukūk-ı şirkete ve hesâbda galat vukū‘una ve ziyâde ücret mutâlebe ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile bi’l-asâle ve bi’l-verâse ve bi’l-vekâle ibrâ ve ıskāt eyledik deyü ikrâr ve tesâdukları meclis-i şer‘a ba‘de’l-inhâ İstanbul Mahkemesi’nden huzûr. Fî 17 min-Ca sene 1242