İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 294 Hüküm no: 239 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran tüccarından Baba Ahmed b. Mehmed’in, İstefan v. Simon’a açtığı şal davasının geçersiz olduğu İki aded şal da‘vâsı men‘i Ma‘rûz İran tüccârından sahib-i arzuhâl Baba Ahmed b. Mehmed nâm kimesne meclis-i şer‘-i münîrde derûn-ı arzuhâlde mastûrü’l-ism İstefan v. Simon zimmî muvâcehesinde ecîrim gāib ani’l-beled Artin v. Serkiz zimmîye mâlımdan li-ecli’l-bey‘ teslîm eylediğim beheri ikişer yüz guruş kıymetli ikisi rengâmîz ve ikisi beyâz ve dört Acem şallarımı alâ-sevmi’n-nazar mersûm İstefan zimmîye verip ba‘dehû İstanbul’da Simkeşhâne kurbünde vâki‘ hemşehrim Tönbekici Molla Mehmed’in dükkânında mersûm İstefan zimmî zikrolunan iki aded rengâmîz şalı getirip bana red ve teslîm etmişdi el-hâletü hâzihî yedinde kalan iki aded beyâz şallar dahi mevcûde ise aynılarını müstehleke ise zamânen kıyme[t]lerini mersûm İstefan zimmîden taleb ederim deyü da‘vâ ettikde ol dahi cevâbında kabzını mu‘terif olduğu iki aded şaldan mâ‘adâ ziyâde iki aded şalı ahzını inkârından mâ‘adâ diğer arzuhâl hâmişine Mahmud Paşa Mahkemesi’nden bâ-fermân-ı âlî derkenâr olunan mazbata kaydında tasrîh olunduğu üzre müdde‘î-i mezbûr Baba Ahmed iki mâh mukaddem sâbık Mahmud Paşa nâibi müderrisîn-i kirâmdan Mustafa Nazif Efendi huzûrunda zikrolunan şallar mersûm Artin zimmînin mâlıdır deyü ikrâr ve i‘tirâf ve kendi dahi mersûmun tarafından vekâletini iki nefer şâhid ile isbât-birle zikrolunan şalları benden mersûm Artin zimmî için bi’l-vekâle da‘vâ etmişdi deyü inkârına mukārin eylediği müdde‘âsını lede’t-tezkiye adl ve makbûlü’ş-şehâde idükleri ihbâr olunan mahkeme-i mezbûre muhzırânından İsmail Çelebi b. Osman ve Feyzullah Çelebi b. İsmail nâm kimesneler şehâdetleriyle bi’l-muvâcehe vech-i şer‘î üzre isbât etmeğin bu sûretde kütüb-i mu‘teberât-ı fıkhiyeden İmâdiye’de velev idde‘â merraten innehû li-fülânin vekkelehû bi’l-husûmetihî fîhi sümme ekāme innehû lî lâ tukbel deyü mastûr ve musarrah olan mes’ele-i müftâ-bihâ mûcibince zikrolunan şalları bir def‘a mersûm Artin zimmînin mâlıdır deyü huzûr-ı şer‘de ikrâr ve bi’l-vekâle da‘vâ etmiş iken ve dönüp bu def‘a kendi mâlımdır deyü bir vechile tevfîk edemeyerek iddi‘âsı kelâm-ı evveline münâkız olmağla şer‘an mesmû‘a olmadığı müdde‘î-i merkūm Baba Ahmed’e tefhîm ve da‘vâ-yı mezkûresiyle mersûm İstefan zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 27 C sene 1242