İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 304 Hüküm no: 249 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü esnafından Yorgi v. Nikola ile Ali b. İbrahim’in yanan kürkçü dükkânından gediğin nakli hususunda anlaştıkları Sandal bezzâzistânı kurbünde kürkçü dükkânı maddesi Âsitâne-i aliyyede vâki‘ kürkçü esnâfından Yorgi v. Nikola zimmî meclis-i şer‘-i münîrde Hallâc es-Seyyid el-Hâc Ali b. el-Hâc İbrahim nâm kimesne muvâcehesinde hâssa kürkçübaşısı el-Hâc Mehmed Emin Ağa hazır olduğu hâlde İstanbul’da Sandal bezzâzistânı ebvâbından Kürkçüler Kapısı hâricinde Kürkçü Hasnan zimmî ve fincâncı dükkânları beynlerinde kâin mezbûrun tasarrufunda olan bir bâb vakıf dükkânın bi’d-defa‘ât mürâfa‘adan verilen i‘lâm-ı şer‘îlerde tasrîh olunduğu üzre verâsında kâin mahâll-i mukarrer derûnunda olan hallâc gediği mezbûrun ve pîşgâhında kâin mahâll-i mu‘ayyen derûnunda mevcûde iki gedik i‘tibâr olunan kürkçü âlât-ı lâzımesi benim mâlımız iken dükkân-ı mezkûr bu def‘a harîkde muhterik oldukda benim binâya kudretim olmadığından rızâmla mâlik olup harîkden tahlîs eylediğim iki aded kürkçü gediği âlâtını âhar dükkâna nakle ta‘ahhüd eylediğimde merkūm es-Seyyid el-Hâc Ali Ağa’dan nakl husûsunda olacak mesârifimi i‘âne tarîkıyle şer‘an bana mâlından dört yüz elli guruş def‘ ü teslîm ve umûruma sarfla istihlâke emreylediğinde ben dahi ahz ü kabz ve emri üzerine umûruma sarfla istihlâk ve âlât-ı müstahlasa-i mezkûreyi âhar mahalle nakledip fîmâ-ba‘d benim dükkân-ı mezkûrda kat‘a alâkam kalmamağla bi’l-cümle hukūk-ı şer‘iyeye ve bedel-i müstehlek-i mezkûrun istirdâdına müte‘allika da‘vâdan tarafeynden her birimiz âharın zimmetini kabûlü [hâvî] ibrâ ve ıskāt etmemizle ba‘de’l-yevm mezbûr es-Seyyid el-Hâc Ali Ağa dükkân-ı mezkûru binâ ve inşâ ve mâlik olduğu hallâc gediğini derûnuna vaz‘la müstakillen isti‘mâline mümâna‘at etmemeğe ben ta‘ahhüd eylediğimde ol dahi benim mâlik olduğum iki aded kürkçü gediklerimi nakleylediğim dükkânda keyfe mâ yeşâ müstakillen zabt ve tasarrufuma müdâhale etmemeğe ta‘ahhüd ve her birimiz âharın ta‘ahhüdünü kabûl ve bu vechile kat‘-ı nizâ‘ eyledik deyü mukırr-ı mersûm Yorgi zimmînin bi’l-cümle takrîr-i meşrûhunu merkūm es-Seyyid el-Hâc Ali Ağa tasdîk eylediği İstanbul Mahkemesi’nden huzûr. Fî 7 C sene [1]242