İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 304 Hüküm no: 250 Orijinal metin no: [49a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa’da yanan muhallebici dükkânın tamiri masrafında, ortakların sulh oldukları Muhallebici dükkânı keşfi Ma‘rûz Sâdır olan fermân-ı âlîlerine imtisâlen zikr-i âtî husûsun mahâllinde ketb ve tahrîri’çün cânib-i şerî‘at-i garrâdan me’zûnen irsâl olunan Kâtib Hasan Şükrü Efendi dâ‘îleri [ve] hâssa mi‘mârı hulefâsından Derviş Ahmed ve Mehmed Tahir Halîfeler ile İstanbul’da Hocapaşa kurbünde Hocapaşa Hânı sırasında sebzeci dükkânı ittisâlinde vâki‘ bir bâb muhallebici dükkânına varıp huzûr-ı Müslimînde akd-i meclis-i şer‘-i nebevî ettikde derûn-ı arzuhâlde mezkûru’l-ism muhallebici esnâfının kethudâsı es-Seyyid Derviş Mehmed Tahir Ağa b. es-Seyyid Ahmed nâm kimesne meclis-i ma‘kūd-ı mezkûrda sahib-i arzuhâlden Defterhâne-i âmire kalemi hulefâsından es-Seyyid Ahmed Seydâ Efendi b. el-Hâc Mehmed Sâdık nâm kimesne muvâcehesinde dükkân-ı mezkûrun nısfı merkūm es-Seyyid Ahmed Seydâ Efendi’nin ve nısf-ı âharı gāib ani’l-meclis Nûr-ı Osmânî Câmi‘-i şerîfi hatîbi el-Hâc Mehmed Tahir Efendi b. el-Hâc Ahmed’in bi’l-iştirâk yedlerinde mülk ve hakları iken bundan akdem bi-kazâillâhi te‘âlâ vukū‘ bulan harîkde muhterik oldukdan sonra ben dükkân-ı mezkûru ancak [49b] mezbûr es-Seyyid Ahmed Seydâ Efendi’nin bi-şartı’r-rücû‘ emriyle heyet-i mevcûdesine sekiz yüz altmış buçuk guruş sarfla muhterik arsa üzerine mi‘mârân-ı mezbûrân misâhalarıyla terbî‘an kırk iki zirâ‘ on beş parmak olarak müceddeden bir bâb muhallebici dükkânı binâ ve inşâ ve ba‘zı noksanıyla terk ettirmemle ol vechile dükkân-ı mezkûrun heyet-i mevcûdesine mâlımdan masrûfum olup mezbûrun zimmetinde bi’l-mürâca‘a alacak hakkım olan meblağ-ı merkūm sekiz yüz altmış buçuk guruşun sekiz yüz altı guruşunu merkūm es-Seyyid Ahmed Seydâ Efendi mukaddemâ ceste ceste bana edâ ve teslîm ben dahi yedinden ahz ü kabz etmemle bâkīsi olan elli dört buçuk guruşu mezbûr es-Seyyid Ahmed Seydâ Efendi[‘den] hâlâ taleb ederim deyü da‘vâya tesâddî eylediğimde ol dahi cevâbında dükkân-ı mezkûrun heyet-i mevcûdesine ancak mâlından emrimle yedi yüz guruş sarf etmenle ber-vech-i muharrer ceste ceste medfû‘um olup kabzını mu‘terif olduğun meblağ-ı mezkûr sekiz yüz altı guruşun yedi yüz guruşunu masrûfun olan meblağ-ı merkūm yedi yüz guruşa takās olunup bakīsi olan yüz altı guruşu taleb ederim deyü benden da‘vâ ve ol vechile beynimizde ba‘de vukū‘ı’l-münâza‘a muslihûn tavassutuyla beynimiz te’lîf ve tanzîm olunup tarafeynden her birimiz tesâddî eylediğimiz de‘âvâ-yı [de‘âvî-i] mezkûrelerimizden meccânen fâriğler olmamızla bi’l-cümle zikrolunan husûslara ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ve ıskāt-ı tâmm-ı sarîh-i mer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîklerini kâtib-i merkūm dâ‘îleri mahâllinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 8 C sene 1242