İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 316 Hüküm no: 261 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşı-yı Kebir’de yangında zarar gören tuhafçı, kalpakçı, şalcı, boğçacı ve bezzaz dükkânlarının tamir masrafları Çarşıda tuhafçı ve kalpakçı ve şalcı ve boğçacı ve bezzâz dükkânları keşfi Ma‘rûz İstanbul’da Çarşı-yı Kebîr’de Kalpakçılarbaşı nâm mahâlde Sorguççu Hânı karşısında vâki‘ dülbendci esnâfından mazbûtü’l-esâmî re‘âyâ kulları bundan akdem beyâz üzerine sudûr eden emr-i âlî-şâna imtisâlen bi-kazâillâhi te‘âlâ vukū‘ bulan harîkde muhterik olan gerek dülbendci ve gerek karşısında kâin tuhafçı ve kalpakçı ve şalcı ve boğçacı ve bezzâz dükkânları ve sûk-ı mezbûrun kemeri ba‘zan ta‘mîr ve ba‘zan tecdîd olunarak tekmîl olunmuş olup ancak yemenîci esnâfı mârrü’z-zikr tuhafçı ve kalpakçı ve şalcı ve boğçacı ve bezzâz dükkânları gedikleri ashâbının hisselerinde bi-şartı’r-rücû‘ emrleriyle eyledikleri mesârifden hisselerini mutâlebe zımnında Bâb-ı Âlî’ye takdîm eyledikleri işbu arzuhâlleri bâlâsına bu dâ‘îleriyle mi‘mâr ağa bendelerine hitâben sâdır olan fermân-ı cihân-mutâ‘a imtisâlen yemenîci esnâfından Yazıcı Bogos v. Agop nâm zimmî meclis-i şer‘-i hatîrde hân-ı mezkûr sırasında vâki‘ zikri âtî yirmi üç kepenk dekâkînden on dokuz kepenk dekâkînin gedik mâlikleri tuhafçı esnâfından Atanaş v. Yani zimmî ve Tavit v. Sabatay ve Rafayel v. Sabatay Yahûdiler ile kalpakçı esnâfından Tanaş v. Yani zimmî asâleten ve Hristo v. Manol zimmî kendi nefsinden asâleten ve Yosef v. Manol zimmî tarafından husûs-ı âtîde vekîl olduğu Küçük Kosti v. Yamandi ve Pandeli v. Kosti zimmîler şehâdetleriyle ve mersûm Küçük Kosti zimmî dahi kezâlik kendi nefsinden asâleten ve Büyük Kosti v. Andon zimmî tarafından kezâlik husûs-ı âtîde vekîl olduğu mersûm Hristo ile Yorgaki v. Andon zimmîler şehâdetleriyle sâbit olmağla vekâleten ve Satırcı oğlu Kosti v. İstefan zimmî tarafından husûs-ı âtîde vekîl olduğu mersûm Pandeli ile Anaştaş v. Yani zimmîler şehâdetleriyle sâbit olan Dimitri v. Kostandi ve Şalcı Agayi v. Andon ve Boğçacı Dimitri v. Yani zimmîler taraflarından kezâlik husûs-ı âtîde vekîl olduğu mersûmân Tanaş ve Dimitri zimmîler şehâdetleriyle sâbit olan mersûm Anaştaş zimmîlerden her biri vekâleten muvâcehelerinde hâssa mi‘mârı hulefâsından Ahmed Mümtaz ve Mehmed Râşid Halîfeler ile dülbendci esnâfının kethudâsı el-Hâc Hâfız Abdülkerim Efendi ve tuhafçı esnâfının kethudâsı es-Seyyid el-Hâc Ahmed Ağa b. es-Seyyid Osman ve kalpakçı esnâfının kethudâsı el-Hâc Mehmed Emin Ağa b. Hüseyin ve sâir esnâf-ı merkūme ustaları hazır oldukları hâlde ben bundan akdem asîl ve müvekkilûn-ı mersûmûn ile hân-ı mezkûr tarafeyninde kâin dört kepenk dekâkînin gedik mâlikleri bezzâz esnâfından gāibân ani’l-meclis Kasber v. Atas ve Asvador v. Avanes zimmîler ile dekâkîn-i mezkûre karşısında kâin yemenîci esnâfı dükkânlarının gedik mâlikleri ma‘lûmü’l-esâmî re‘âyânın huzûrlarında bi-şartı’r-rücû‘ emirleriyle gerek her birinin dükkânları üzerinde olan kemerlerinin ve gerek hân-ı mezkûr kapısıyla tarîk-ı cadde kemerinin iktizâsına göre ta‘mîr ve tecdîdine ber-mûcib-i defter-i keşf mâlımdan masrûfum olan yirmi iki bin yedi yüz otuz buçuk guruş on üç akçeden mi‘mârân-ı mezbûrânın bu def‘a huzûr-ı şer‘de ihbârlarıyla hân-ı mezkûr sırasında vâki‘ yirmi üç kepenk dekâkînin gedik mâlikleri asîl ve müvekkilûn-ı mersûmûn ile gāibân-ı mesfûrânın hisselerine isâbet edip bi’l-mürâca‘a alacak hakkım olan on iki bin iki yüz elli iki guruş dört para yirmi üç sehme taksîm olundukda beher kepenk dükkânın gedik mâlikine beşer yüz otuz ikişer buçuk guruş sekiz para isâbet edip ancak asîl ve müvekkilûn-ı mersûmûnun adem-i kudretlerine binâen seksen ikişer buçuk guruş sekiz parasını yemenîci esnâfının dekâkîn-i mezkûre gedik mâlikleri rızâlarıyla bana edâ ve teslîm etmeleriyle mâ‘adâ dörder yüz ellişer guruşdan ber-vech-i bâlâ on dokuz kepenk dekâkîn gedikleri mâlikleri asîl ve müvekkilûn-ı mersûmûnun zimmetlerinde müctemi‘ sekiz bin beş yüz elli guruşun üç bin yüz on sekiz guruşunu mukaddemâ mersûmûnun yedlerinden kabz etmemle bâkīsi olan beş bin dört yüz otuz iki guruşu asîl ve müvekkilûn-ı mersûmûna izâfetle vükelâ-i mesfûrûndan bi’l-mürâca‘a taleb ederim deyü da‘vâ onlar dahi cevâblarında kazıyye minvâl-i meşrûh üzre olup meblağ-ı bâkī-i mezkûr beş bin dört yüz otuz iki guruş asîl ve müvekkilûn-ı mersûmûnun el-yevm zimmetlerinde sahîhan deyni olduğunu her biri bi’l-asâle ve bi’l-vekâle ikrâr ve i‘tirâf ve çend-rûz zarfında edâya müte‘ahhidler oldukları İstanbul Mahkemesi’nden huzûr. Fî 6 min-Recebi’l-ferd sene 1242 Nüshateyn