İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 317 Hüküm no: 262 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Mustafa’nın, Eski Ali Paşa’daki kasab gediğini Feyzullah b. Mehmed’e devrettiği Kasab gediği ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -tâbe serâhu- hazretleri evkāf-ı şerîfelerinden Yedikule hâricinde kâin gayrı-ez selhhâne-i mîrî on aded ganem selhhânelerinden sekizinci selhhâneye merbût İstanbul’da Küçükkaraman’da üç yol ağzında vâki‘ bir bâb dördüncü selhhâneye merbût Eski Ali Paşa’da vâki‘ bir bâb kasab dükkânları derûnlarında mevcûde gedik ta‘bîr olunur âlât-ı lâzıme-i ma‘lûmelere bâ-temessük-i mütevellî bi’l-icâreteyn mutasarrıf olan İbrahim Ağa b. Mustafa meclis-i şer‘-i münîrde kasab tâifesinden Feyzullah b. Mehmed tarafından husûs-ı âtîde tasdîka vekîl-i şer‘îsi İsmail Ağa b. Mustafa muvâcehesinde kasablar kethudâsı el-Hâc Hasan Ağa hazır olduğu hâlde ben ber-vech-i muharrer mutasarrıf olduğum iki bâb dükkân gediklerini hüsn-i rızâ ve tayyib-i hâtırım ve ferâğ-ı mu‘teber-i kat‘î ile müvekkil-i merkūm Feyzullah’a bedel-i ma‘lûm ve makbûz mukābelesinde bâ-re’y-i mütevellî ferâğ ve tefvîz ve her birini teslîm eylediğimde ol dahi ber-vech-i muharrer tefevvüz ve tesellüm ve kabz ve kabûl etmekle fîmâ-ba‘d gedik-i mezkûrlar merkūm Feyzullah’ın hakk-ı müfevvazı olup benim alâkam kalmamışdır deyü ba‘de’t-takrîr ve’t-tasdîk gedik-i mezkûrların kaydı fâriğ-i merkūm İbrahim Ağa üzerinden ref‘ ve terkīn ve defter-i vakf-ı şerîfde mezbûr Feyzullah ismine sebt ü kayd ve hâmiş-i temessüke tahrîr ü temhîr ve yedine i‘tâ olunmasını istid‘â eyledikleri İstanbul Mahkemesi’nden huzûr. Fî 3 C sene 1242