İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 321 Hüküm no: 266 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosko v. Tanaş’ın, kasab gediği hissesini İsteryo v. Niko’ya, onun da Ali Ağa b. Osman’a devrettiği Kasab ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -tâbe serâhu- hazretleri evkāf-ı şerîfelerinden Yedikule hâricinde vâki‘ gayrı-ez selhhâne-i mîrî on aded ganem selhhânelerinden sekizinci selhhâneye merbûr [merbût] İstanbul’da Hocapaşa Çarşısı’nda kâin ma‘lûmü’l-hudûd bir bâb kasab dükkânı derûnunda mevcûde gedik ta‘bîr olunur âlât-ı lâzıme-i ma‘lûmenin nısf-ı şâyi‘ine bâ-temessük-i mütevellî bi’l-icâreteyn mutasarrıf olan Mosko v. Tanaş zimmî tarafından husûs-ı âtîde vekîl olduğu Kiziro v. Kriço ve Tiro v. Koço nâm zimmîler şehâdetleriyle sâbit olan Nikola v. Panayot nâm zimmî meclis-i şer‘-i münîrde kasab tâifesinden İsteryo v. Niko zimmî muvâcehesinde kasablar kethudâsı el-Hâc Hasan Ağa hazır olduğu hâlde müvekkilim mersûmun ber-vech-i muharrer mutasarrıf olduğu nısf hisse-i mezkûresini müvekkilim mersûmun hüsn-i rızâ ve tayyib-i hâtırı ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûm İsteryo zimmîye bi’l-vekâle ferâğ ve tefvîz ve vech-i lâyıkı üzre teslîm eylediğimde ol dahi ber-vech-i muharrer tefevvüz ve kabûl etmekle fîmâ-ba‘d nısf hisse-i mezkûre mersûm İsteryo zimmînin dâhil-i havza-i tasarrufu olup müvekkilim mersûmun alâkası kalmamışdır deyü ba‘de’l-ikrâr ve’t-tasdîk mesfûr İsteryo zimmî meclis-i şer‘-i hatîrde Yedikule’de kasab ustası el-Hâc Ali Ağa b. el-Hâc Osman mahzarında takrîr-i kelâm edip ben ânifen tefevvüz eylediğim nısf hisse-i mezkûremi hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî merkūm el-Hâc Ali Ağa’ya ferâğ ve tefvîz ve tarîk-ı lâyıkı üzre teslîm eylediğimde ol dahi ber-vech-i muharrer tefevvüz ve kabûl etmeğin fîmâ-ba‘d nısf hisse-i mezkûre merkūm el-Hâc Ali Ağa’nın dâhil-i havza-i tasarrufu olup benim alâka ve medhalim kalmamışdır deyü mukırr-ı mersûm İsteryo zimmînin takrîr-i meşrûhunu merkūm el-Hâc Ali Ağa tasdîk etmekle nısf gedik-i mezkûrun fâriğ-i evvel mersûm Mosko zimmî ismine olan kaydı defter ve vakf-ı şerîfden ref‘ ve terkīn ve mütefevviz-i sânî-i merkūm el-Hâc Ali Ağa ismine tashîhan kayd ve hâmiş-i temessüke temhîr ile yedine i‘tâ olunması[nı] istid‘â eylediği İstanbul Mahkemesi’nden huzûr. Fî 29 C sene [1]242