İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 322 Hüküm no: 267 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Sultan mahallesindeki Ali Bey Vakfı tevliyetinin Hatice bt. İsmail’e tevcihi için beratı istendiği Tevliyet tevcîhi istid‘âsı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda nezâret-i dâ‘îlerinde olan evkāfdan İstanbul’da Hadîce Sultân mahallesinde vâki‘ merhûm Ali Bey Vakfı’nın vazîfe-i mu‘ayyene ile tevliyetine ber-vech-i meşrûta bâ-berât ve mülhakı Hümâ Hatun tevliyetine bilâ-berât mutasarrıf olan Mustafa ibnü’ş-şeyh Mehmed bundan akdem fevt oldukda nevbet-i tasarruf amel-i kadîm üzre sulbî oğlu Mehmed’e ba‘de’l-intikāl kable’t-tevcîh merkūm Mehmed dahi fevt olup sulbî oğlu el-Hâc İsmail’e intikāl etmiş ise de ol dahi üzerine tevcîh ve berat ettirmeksizin bundan akdemce vefât ve tevliyet-i mezkûreler sulbiye sahîha kızı Hadîce nâm sagīreye intikāl eylediğinden bahisle tevliyet-i mezkûreler şart-ı vâkıf ve amel-i kadîm üzre babası mahlûlünden sagīre-i mezbûreye tevcîh buyurulmasını vâlidesi ve bâ-hüccet-i şer‘iye vasîyy-i mansûbesi İstanbul’da Langa kurbünde Bostancıbaşı Abdullah Ağa mahallesinde sâkine sahibe-i arzuhâl Âişe bt. Ömer nâm Hatun bi’l-vesâye istid‘â ve istirhâm eylediği mefhûm-ı arzuhâlden müstebân ve tevliyet-i mezkûreler vech-i meşrûh üzre merkūm Mustafa’nın üzerinde olduğu hâmiş-i arzuhâlde mezkûr küçük evkāf muhâsebesi ve derkenârından müstefâd ve nümâyân oldukdan sonra vasîyy-i mezbûrenin sûret-i istid‘âsı vâkı‘a mutâbık ve nefsü’l-emre muvâfık olduğunu mahâlle-i mezbûre imâmı Mustafa Efendi b. İbrahim ve ahâlîsinden Sofalı Osman b. Mehmed Emin nâm kimesneler meclis-i şer‘-i şerîfde alâ-tarîkı’ş-şehâde ihbâr eylediklerinden mâ‘adâ sagīre-i mezbûrenin hîn-i liyâkatine değin umûr-ı vakf-ı mezkûru idâre ve rü’yete vâlidesi mezbûre Âişe Hatun taraf-ı şer‘-i enverden kāimmakām nasb ve ta‘yîn olunmağın bu sûretde meşrûtun-lehâsı sagīre-i mezbûrenin vakt-i rüşd ve sedâdına değin umûr-ı vakf-ı şerîfi kāimmakām-ı mezbûre idâre etmek üzre tevliyeteyn-i mezkûreteyn babası müteveffâ-yı mezbûr el-Hâc İsmail Efendi mahlûlünden sulbiye sahîha kızı sagīre-i mezbûre Hadice’ye tevcîh ve yedine müceddeden berat-ı şerîf-i âlî-şân sadaka ve ihsân buyurulmak emr-i savâb idüğü İstanbul Mahkemesi’nden huzûr. Fî 19 min-B sene [1]242