İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 323 Hüküm no: 268 Orijinal metin no: [52b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midillili Panayot v. Yuvan’ın, Sabun Nâzırı Tiryâkizâde Mehmed Ağa’da olan alacağını tahsil ettiği Husûsla 5508 guruş ahz ü kabz ve şirketden ibrâ Ma‘rûz Sabun tüccârından sahib-i arzuhâl Midillili Panayot v. Yuvan nâm zimmî savb-ı şer‘-i enverden me’zûnen mürsel Kâtib es-Seyyid Ahmed Efendi dâ‘îlerinin İstanbul’da Tahte’l-kal‘a [Tahtakale] kurbünde Sulu Han derûnunda vâki‘ sabun tüccârından Giridî Rüstem Hoca’nın odasında huzûr-ı Müslimînde akd eylediği meclis-i şer‘-i münîrde derûn-ı arzuhâlde mezkûru’l-ism hâlâ Sabun Nâzırı Giridî Tiryâkizâde Mehmed Ağa b. Mustafa nâm kimesne muvâcehesinde bin iki yüz kırk senesi Muharremi’l-harâmının dokuzuncu günü ben mâlımdan on bin guruş ve mezbûr Mehmed Ağa dahi mâlından yirmi bin guruş ve Midilli cezîresinde mütemekkin Kalfa v. Tokaki zimmî dahi mâlından on bin guruş ki cem‘an kırk bin guruş ifrâz ve birbirine halt ile fâide-i hâsıla beynimizde beraber iktisâm olunmak üzre sabun ticâretinde ınânen akd-i şirket-birle hesâbımızı tarafeynin defterlerine tatbîkan ma‘rifet-i şer‘ ve tüccâr ma‘rifetiyle sehv ve galatdan ârî hesâb-ı sahîh ile yegān yegān rü’yet eylediğimizde gerek re’s-i mâl ve gerek [53a] fâide-i hâsıladan merkūm Mehmed Ağa zimmetinde benim iki bin yedi yüz elli dört guruş ve gāib-i mersûm Milka zimmînin dahi kezâlik iki bin yedi yüz elli dört guruş hakkımız zuhûr ettikde ol dahi tasdîk ve benim hissem olan meblağ-ı merkūm iki bin yedi yüz elli dört guruşu tamamen bana edâ ve gāib-i mersûm Milka zimmînin hissesi olan meblağ-ı merkūm iki bin yedi yüz elli dört guruşu dahi gāib-i mersûma götür ver deyü bana teslîm ben dahi cem‘an beş bin beş yüz sekiz guruşu vech-i muharrer üzre ahz ü kabz edip bi’l-cümle husûs-ı şirkete ve hesâbda galat vukū‘una ve işbu târih-i kitâba gelince sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini şurût-ı müfsideden ârî ibrâ-i âmm-ı sahîh-i şer‘î ile ibrâ ve ıskāt eyledik deyü ikrâr ve tasdîklerini kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği ba‘de’t-tenfîz İstanbul Mahkemesi’nden huzûr. Fî 15 min-Recebi’l-ferd sene 1242 Nüshateyn