İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 324 Hüküm no: 270 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 10400 baş Boğdan koyununun dağıtımı ve fiyatlarının tespiti 10400 ağnam tevzî‘i Ma‘rûz Sekene-i Dârü’s-saltanati’s-seniyyenin akvât-ı yevmiyeleri’çün bu def‘a Boğdan cânibinden kışlak ağnamı sevk eden celeb tâifesinden bin sekiz yüz ganem sahibi Yanaki ve sekiz yüz ganem sahibi Kuru Kafa ve bin yedi yüz elli ganem sahibi Paskal ve bin beş yüz ganem sahibi Kosta ve bin iki yüz ganem sahibi Aleksi ve bin ganem sahibi diğer Kosta ve sekiz yüz ganem sahibi Anaştaş ve sekiz yüz ganem sahibi Yorgi ve yedi yüz elli ganem sahibi Lazko zimmîler meclis-i şer‘-i münîrde kassâbân kethudâsı el-Hâc Hasan Ağa ve kasab ustaları muvâcehelerinde ber-vech-i bâlâ celb eylediğimiz cem‘an on bin dört yüz re’s ağnamın narh-ı cârî üzre beher vakıyye lahmını yirmi yedişer paraya ve sakatlarını dahi yirmişer paraya kasab esnâfına bey‘a onlar dahi iştirâ ve ber-mu‘tâd Perşembe ve Cum‘a günleri ta‘tîl ederek tevzî‘-birle yevm-i tevzî‘den elli bir gün tamamında yaftalarını ve doksan bir gün hitâmında dahi îcâb eden esmânını bize edâya ve mu‘tâd üzre üçer para zamla beher vakıyye lahm-ı ganemi ibâdullâha otuzar paraya bey‘a tarafeynden her birimiz ta‘ahhüd eyledik deyü takrîrlerini kasab esnâfı merkūmûn tasdîk eyledikleri İstanbul Mahkemesi’nden huzûr. Fî 3 C sene 1242