İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 330 Hüküm no: 276 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu Kazaskeri Mehmed Hamdullah’ın, ekmekçi tablakârı Divyo’ya ekmek bedelinden 427 guruş borcu olduğu Nân semeninden 427 guruşu edâya ta‘ahhüd Ma‘rûz Sâbıkā Dârü’s-saltanati’s-seniyyede pîrâye-bahş-ı mesned-i izzet-mend-i hüküm ve kazâ olup Anadolu sadâreti pâye-i şeref-vâyesiyle ta‘zîm buyrulan devletlü semâhatlü el-Hâc Mehmed Hamdullah Efendi hazretleri necl-i necîl-i şeyhülislâm-ı esbak -vâsıl-ı rahmetine Hakk- el-Hâc Mehmed Ârif Efendi Hazretlerinden zikri âtî meblağı bi’l-vekâle istid‘â eden Debreli Pandeli v. İstifo v. Gülcü zimmî cânib-i şer‘-i enver-i lem‘-i nebevîden me’zûnen mürsel es-Seyyid Salih Afîf Efendi bendelerinin Süleymâniye kurbünde kâin devlethânelerinde huzûr-ı semâhat-mevfûrlarında akd eylediği meclis-i şer‘-i âlîde ekmekçi tablakârlarından li-ebeveyn er karındaşım Divyo zimmî müşârün-ileyh hazretleri dâire-i devletlerine verdiği nân-ı azîzin lede’l-muhâsebe esmânı olan dört yüz yirmi yedi guruşu almadın karındaşım mesfûr bâ-fermân-ı âlî mahrûse-i Bursa’ya nefy ü iclâ olunmağla gider iken bin iki yüz kırk senesi Ramazanının beşinci günü Şehzâdebaşı Fırını’nda meblağ-ı mezkûru taleb ve ahz ü kabz ve ibrâya tarafından beni vekîl edip ben dahi vekâlet-i mezkûreyi kabûl etmemle bi’l-vekâle taleb ederim dedikde müşârün-ileyh hazretleri dahi deyn-i mezkûru ikrâr ve vekâleti inkâr buyurduklarında zimmî-i mesfûr ber-vech-i meşrûh vekâletini lede’t-tezkiye makbûlü’ş-şehâde idükleri ihbâr olunan Debreli Tahir b. Hüseyin ve İbrahim b. Mustafa nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât ve’l-hükm taraf-ı şer‘-i şerîfden edâsıyla ilzâm olunan deyn-i mezkûru vekâleti sâbit olan mersûm Pandeli zimmîye i‘tâya ta‘ahhüd buyurdukları bi’l-inhâ İstanbul Mahkemesi’nden huzûr. Fî-gurreti Şa‘bâni’l-mu‘azzam sene 1242