İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 329 Hüküm no: 275 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Said Ağa b. Yahya’nın kazzaz gediğinin, Şerife Emine bt. Mehmed ile Şerife Saide bt. Mehmed’e devrolunduğu Kazzâz mübâya‘ası Ma‘rûz Âsitâne-i aliyyede vâki‘ kazzâz esnâfının sâbık kethudâsı olup bundan akdem fevt olan Mehmed Said Ağa b. Yahya’nın verâseti kız karındaşı müteveffât Münevvere Hatun’un sadrî kebîr oğulları Mehmed ve Hüseyin Hüsnü ile sülüs vasiyyetine münhasıra olduğu bi’l-ihbâr ba‘de’t-tahakkuk mezbûrân Mehmed ve Hüseyin Hüsnü ile sülüs mâlından vesâyâ-yı mu‘ayyene ve gayrı mu‘ayyenesini tenfîze vasîyy-i muhtârı Mehmed Emin Efendi b. Abdullah’dan her biri meclis-i şer‘-i münîrde mezbûr Mehmed’in zevcesi Şerife Emine bt. Mehmed ve merkūm Hüseyin’in zevcesi Şerife Saide bt. Mehmed nâm hatunlar taraflarından husûs-ı âtîde tasdîka vekîl-i şer‘îleri merkūme Şerife Saide’nin babası merkūm Mehmed b. Ahmed muvâcehesinde hâlâ kethudâları Abdüllatif Ağa tarafından mürsel yiğitbaşı Molla Mehmed hazır olduğu hâlde her biri bi’l-verâse ve bi’l-vesâye takrîr-i kelâm edip mûrisimiz müteveffâ-yı merkūm Said Ağa’nın hayatında bâ-sûret mâlı olup ba‘de vefâtihî bize ve sülüs-i vasiyyetine mûris olan İstanbul’da Çarşı-yı Kebîr’de Çakır Ağa zukāğı demekle ma‘rûf sûkda Kalpakçılar karşısında Dülbendciler zukāğı başından Yağlıkçılar sûkunda basmacı dükkânına müntehî oluncaya değin vâki‘ zukāk tarafeyninde kâin dekâkînden Kazzâz Al Yanak Yahûdî dükkânı ittisâlinde -sahh sahh- kâin bir bâb kazzâz dükkânı gediği ta‘bîr olunan âlât-ı lâzıme-i ma‘lûmeyi mezbûre Şerife Emine Hatun’a ve Yağcı Kigork zimmî dükkânı ittisâlinde kâin bir bâb kazzâz dükkânı gediği ta‘bîr olunan âlât-ı lâzıme-i ma‘lûmeyi mezbûre Şerife Saide Hatun’a tarafeynden bi’l-îcâb ve’l-kabûl bâtten ve sahîhan bi-safkatin vâhidetin yedişer yüz ellişer guruşdan cem‘an bin beş yüz guruş semen-i makbûza bi’l-verâse ve bi’l-vesâye bey‘ ve temlîk ve teslîm eylediğimizde onlar dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl bey‘-ı mezkûrun tağrîr ve gabnine müte‘allika da‘vâdan müvekkiletân-ı mezbûretânın zimmetlerini bi’l-verâse ibrâ ve ıskāt edip bi’l-vesâye dahi da‘vâ ve nizâ‘ımız kalmamağla fîmâ-ba‘d sâlifü’z-zikr Al Yanak Yahûdî dükkânı ittisâlinde olan dükkân gediği ta‘bîr olunur âlât-ı lâzıme-i ma‘lûme müvekkile-i mezbûre Şerife Emine Hatun’un ve mârrü’z-zikr Kigork zimmî dükkânı ittisâlinde olan dükkân gediği ta‘bîr olunur âlât-ı lâzıme-i ma‘lûme müvekkile-i mezbûre Şerife Saide Hatun’un mal-ı müşterâları ve hakk-ı sırfları olup bizim asla ve kat‘a alâka ve medhalimiz kalmamışdır deyü ba‘de’l-ikrâr ve’t-tasdîk gedik-i mezkûrların müteveffâ-yı mezbûr Said Ağa ismine olan kaydları Başmuhâsebe’den ref‘ ve terkīn ve müşteriyetân-ı mezbûretân isimlerine tashîhan kayd ile yedlerine başka başka sûret i‘tâsını istid‘â eyledikleri İstanbul Mahkemesi’nden huzûr. Fî 2 min-Recebi’l-ferd sene 1242