İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 331 Hüküm no: 278 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakaş Avakim v. İsak’ın, Bartınlı İsmail Kaptan b. Ali’ye açtığı kefalet davasının geçersiz olduğu 1800 guruş kefâlet men‘i Ma‘rûz İstanbul’da Yolgeçen Hânı’nda mütemekkin bogāsıcı esnâfından sahib-i arzuhâl Karakaş Avakim v. İsak zimmî meclis-i şer‘-i münîrde pirinççi esnâfından derûn-ı arzuhâlde mezkûru’l-ism Bartınlı es-Seyyid İsmail Kaptan b. es-Seyyid Ali nâm kimesne muvâcehesinde benim Hasan Reis nâm zimmetinde târih-i i‘lâmdan yedi sene mukaddem yedimden ve mâlımdan iştirâ ve kabz eylediği yüz top Kadıköyü alacası ve yüz top Mağnisa alacası ve elli top Kastamonu çiti ve elli top Kastamonu astarı ve yirmi top Denizli kırmızı bogāsi ve yirmi top Denizli beyâz bogāsi ve on top kırmızı astar semeninden cem‘an alacağım olan iki bin beş yüz guruşa mezbûr es-Seyyid İsmail Kaptan kefîl olup ba‘dehû iki sene mürûrunda merkūm Hasan Reis meblağ-ı merkūm iki bin beş yüz guruşun yedi yüz guruşunu merkūm es-Seyyid İsmail Kaptan ma‘rifetiyle bana teslîm edip bâkīsi olan bin sekiz yüz guruşu edâ etmedin vilâyeti olan sâlifü’z-zikr Bartın kasabasına azîmet ve kasaba-i mezbûrede vefât etmekle meblağ-ı bâkī-i merkūm bin sekiz yüz guruşu kefâletine binâen mezbûr es-Seyyid İsmail Kaptan’dan taleb ederim deyü mezbûrun külliyen inkârına mukārin da‘vâ edip lâkin müteveffâ-yı mezbûrun babası ismini dahi bilemeyip nesebini beyâna kādir olamamağla bu sûretde bundan akdem verilen fetvâ-yı şerîfede Zeyd Amr’dan Bekir’in zimmetinde olan şu kadar akçe hakkıma kefîl olmuşdun deyü da‘vâ edip lâkin Bekir’in nesebini beyâna kādir olmasa Zeyd’in da‘vâsı mesmû‘a olmaz deyü mastûr ve musarrah olmağın mûcibince müdde‘î-i mersûm Avakim zimmî müteveffâ-yı mezbûr Hasan Reis’in nesebini beyâna kādir olamamışiken tesâddî eylediği kefâlet da‘vâsı ber-muktezâ-yı şer‘-i şerîf mesmû‘a olmadığı kendüye tefhîm ve da‘vâ-yı mezkûresiyle merkūm es-Seyyid İsmail Kaptan’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 2 min-Şa‘bâni’l-mu‘azzam sene 1242 [Beyaz Beyaz]