İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 340 Hüküm no: 287 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipah Pazarı’nda silah satan dükkânların tüccarının, yangın sonrası Bat Pazarı’nda esvâb ticaretine teşebbüsleri Sipâh Pazarlı tâifesi Bât Pazarı esnâfına ilhâkiyetleri [Sürh ile kayd:] Bâ-sahh-ı âlî - İ‘lâmı mûcibince amel olunup ihtisâb ve mi‘mâr ağa taraflarına dahi ilm u haberi i‘tâ olunmak deyü. Fî 21 Ş sene 1242 Ma‘rûz Sâdır olan fermân-ı âlîlerine imtisâlen ashâb-ı arzuhâl İsmail Ağa ve Ömer Ağa ve Abdullah Ağa ve sâirleri ihtisâb ağası bendeleri hazır olduğu hâlde meclis-i şer‘-i münîrde biz Âsitâne-i aliyyede Çarşı-yı Kebîr’de Bat Pazarı kurbünde Sipâh Pazarı denilen mahâlde mukaddemâ defter-i keşfde muharrer dekâkînde esliha bey‘ ve şirâsıyla me’lûf iken harîkde muhterik oldukda fîmâ-ba‘d esliha bey‘ ve şirâsıyla -sahh- intifâ‘ edemeyeceğimiz zâhir olduğuna binâen rızâmızla keff-i yed ve yedimizde olan envâ‘-ı eslihayı bezzâzistân-ı atîkde füruht ettirerek ba‘de’l-yevm dükkânlarımızı yaptırıp Bat Pazarı misillü esvâb bey‘ ve şirâsına teşebbüs murâd etmemizle hazır bi’l-meclis Bat Pazarı kethudâsı es-Seyyid Mehmed Sâdık Ağa bize dahi kethudâ olarak zukāğımıza bir yiğitbaşı nasb ve ta‘yîn ve ba‘de’l-yevm biz dahi Bat Pazarı esnâfı olarak sâye-i merhamet-vâye-i hazret-i zıllullahîde ta‘yyüşümüze müsâ‘ade buyurulmak niyâzımızdır deyü istid‘â ve istirhâm eylediklerinde istid‘âları yolunda olmağla içlerinden merkūm İsmail Ağa yiğitbaşı nasb olunduğu ma‘lûm-ı ilm-i âlem-ârâları buyruldukda niyâzlarına müsâ‘ade-i merâhim-âde-i seniyyeleri erzân buyurulmak emr-i savâb idüğü İstanbul Mahkemesi’nden huzûr. Fî 7 Ş sene 1242