İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 340 Hüküm no: 288 Orijinal metin no: [55b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’ın, tasarruf ettiği kurşuncu mahzenini cebren kiraya veremeyeceği Kurşuncu mahzeni istîcâr da‘vâsı men‘i Ma‘rûz İstanbul’da Müftü Ali mahallesinde sâkine sahibe-i arzuhâl Âişe bt. Abdullah nâm hatun tarafından husûs-ı âtîde vekîl olduğu zâtını ârifân el-Hâc İbrahim Ağa b. Lütfullah ve Mustafa Ağa b. İsmail nâm kimesneler şehâdetleriyle sâbit olan Mustafa Efendi b. Abdullah Çarşamba günü Arz Odası’nda huzûr-ı lâmi‘u’n-nûr-ı vekâlet-penâhîlerinde bi’l-ma‘iyye istimâ‘a me’mûr nezâret-i aliyye-i âsafânelerinde âsûde evkāf müfettişi mevâlî-i ızâmdan fazîletlü es-Seyyid Ahmed Efendi dâ‘îleri hazır olduğu hâlde Enderûn-ı hümâyûn kurşuncubaşısı olup zîr-i sâye-i himâyet-vâye-i müşîrânelerinde mahmî Süleymâniye Câmi‘-i şerîfi kurşunculuğunun yevmî iki buçuk akçe vazîfe ile nısfına mutasarrıf olan Hâfız Abdülkerim b. el-Hâc Mehmed ve kezâlik iki buçuk vazîfe ile nısf-ı âharına mutasarrıf olan Hâfız Mustafa b. el-Hâc Hasan muvâcehelerinde vakf-ı müşârün-ileyh mütevellîsi izzetlü Halil Bey bendeleri kezâlik hazır olduğu hâlde hâmiş-i arzuhâlde mastûr defter-i vakıfdan muhrec derkenâr nâtık olduğu üzre vakf-ı müşârün-ileyhden câmi‘-i mezkûr civârında dârü’ş-şifâ tahtında kâin beher şehr kırk beş akçe icâreli bir bâb kurşuncu mahzeni ve beher şehr kırk beş akçe icâreli bir kıt‘a odun mahzeni müvekkilem mezbûre Âişe Hatun’un bâ-temessük-i mütevellî bi’l-icâreteyn tasarrufunda olup derûnunda câmi‘-i mezkûr kurşuncuları mezbûrân şehriye yetmiş beşer guruş kirâ ile müste’ciren sâkinler iken merkūmân Abdülkerim ve Mustafa şehr-i sâbık Recebi’l-ferd gāyetinde fesh-i akd-i icâre ile zikrolunan mahzenlerden çıkıp bize teslîm etmişler idi lâkin Haremeyn Muhâsebesi derkenârında iş‘âr olunduğu üzre cihet-i mezkûre mutasarrıfları kadîmi sürbî mahzeninde rihte kurşunu i‘mâl edip mahâll-i âhara i‘mâl etmemeleri beratları şurûtundan olmağla [56a] öyle olıcak zikrolunan mahzenleri cihet-i mezkûre mutasarrıfları mezbûrân şehriye yetmiş beşer guruşa istîcara cebr olunmak bi’l-vekâle murâdımdır deyü da‘vâ edip lâkin mezbûrân kabûl etmemeleriyle bu sûretde ber-muktezâ-yı şerî‘at-i garrâ cebre kādir olamadığı beyân olundukda muktezâ-yı şer‘-i şerîf üzre amel ve hareket olunup müvekkile-i mezbûre Âişe Hatun zikrolunan mahzenleri dilediği kimesnelere îcâr etmek bâbında lisânen sâdır olan fermân-ı âlem-mutâ‘ları tarafeyne tefhîm olunduğu İstanbul Mahkemesi’nden huzûr. Fî 18 B sene 1242