İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 349 Hüküm no: 295 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Yasin Ağa’nın evi ile Karabet v. Serkiz evi arasındaki yıkılmak üzere olan duvarı ortaklaşa tamir ettirecekleri Keşf-i dîvâr Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde lede’l-mu‘âyene keşf ve tahkīk için cânib-i şerî‘at-i garrâdan me’zûnen irsâl olunan Kâtib Mehmed Hidâyetullah Efendi dâ‘îleri bi’l-ma‘iyye rü’yete me’mûr <> nezâret-i hazret-i sadrıazâmîde âsûde evkāf müfettişi mevâlî-i ızâmdan fazîletlü es-Seyyid Ahmed Efendi tarafından meb‘ûs Kâtib Ahmed Nuri Efendi hâssa mi‘mârı hulefâsından Selim Sâbit ve es-Seyyid Abdülkadir Halîfeler ile nezâret-i dâ‘îlerinde olan evkāfdan ashâb-ı hayrâtdan merhûm el-Hâc Bayram Haftânî [Kaftânî] Vakfı müsakkafâtından İstanbul’da Langa-i Kebîr kurbünde Mesîh Paşa-yı Atîk mahallesinde tarîk-ı hâsda vâki‘ münâza‘un-fîh olan ma‘lûmü’l-hudûd bir bâb menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettiklerinde menzil-i mezkûra bâ-temessük-i mütevellî bi’l-icâreteyn eslâsen mutasarrıflar olup kendi nefsinden asîl ve zevcesi Vesim Hatun bt. eş-Şeyh Mustafa ile sulbî kebîr oğlu es-Seyyid Abdullah Ağa taraflarından husûs-ı âtîde vekîl olduğu mezbûrenin zâtını ârifân Basmacı Mustafa Ağa b. Hüseyin ve Oturakçı es-Seyyid Mustafa Ağa b. es-Seyyid Osman şehâdetleriyle ber-nehc-i şer‘î sâbit olan derûn-ı arzuhâlde mezkûru’l-ism es-Seyyid el-Hâc Mehmed Yâsin Ağa [b.] es-Seyyid Abdüssâfî el-Halebî meclis-i ma‘kūd-ı mezkûrda menzil-i mezkûr verâsında kâin nezâret-i hazret-i müşârün-ileyhde olan evkāfdan merhûm Hoca Pîrî Mehmed Efendi Vakfı müsakkafâtından Şeyh Ferhad mahallesinde Ayazma Konağı nâm mahâlde tarîk-ı hâsda vâki‘ ma‘lûmü’l-hudûd bir bâb menzile bâ-temessük-i mütevellî bi’l-icâreteyn bi’l-münâsafa iştirâken mutasarrıflar olan Duhânî Aci Melkon v. İstefan zimmî ve zevcesi [57b] şahsı mu‘arrefe Hanıma bt. Ohannes Nasrâniye ve ittisâlinde kâin yine vakf-ı mezbûrdan müfrez ma‘lûmü’l-hudûd bir bâb menzile bâ-temessük-i mütevellî ber-vech-i iştirâk bi’l-icâreteyn mutasarrıflar olan sahib-i arzuhâl Karabet v. Serkiz zimmî zevcesi mu‘arrefetü’ş-şahs Veron bt. Kigork Nasrâniye muvâcehelerinde merhûm mezbûr el-Hâc Bayram Haftânî [Kaftânî] Vakfı’nın mütevellîsi müderrisîn-i kirâmdan zâde-i Morevîzâde el-Hâc Mehmed Halid Efendi tarafından mürsel vekîli kâtib-i vakf Mustafa Efendi b. Ali ve merhûm mezbûr Hoca Pîrî Mehmed Efendi Vakfı’nın mütevellîsi kâtib-i hazîne-i hazret-i sadr-ı âlî es-Seyyid Mustafa Efendi tarafından vekîl-i mürseli câbî-i vakf es-Seyyid Ebûbekir Efendi b. es-Seyyid Halil hazır oldukları hâlde işbu derûnunda akd-i meclis-i şer‘-i âlî olunan menzil-i mezkûr verâsında kâin mi‘mârân-ı mezbûrân mîsâhalarıyla tûlen on bir zirâ‘ altı parmak ve arzan bir zirâ‘ ve kadden beş zirâ‘ on beş parmak menzilimizin taş sed dîvârı ittisâlinde zimmiyûn-ı mersûmûnun menzilleri olup dîvâr-ı mezkûra müstenid olduğundan bu esnâda menzillerini ba‘zan ta‘mîr ve ba‘zan tecdîd ile inşâ ettiklerinde zikrolunan dîvârın ba‘zı mahalli münhedim ve ba‘zı mahalli dahi inhidâma mâil olduğundan payanda ile tutturulup ol vechile bize küllî mazarrâtı olduğundan mûcib-i şer‘îsini da‘vâya tesâddî etmişdik el-hâletü hâzihî muslihûn tavassutuyla beynimiz ıslâh ve tanzîm olunup ben zimmiyûn-ı mersûmûna mâlımdan teberru‘an iki yüz guruş def‘ ü teslîm ve zikrolunan dîvârı inşâya harc ve sarfla istihlâke emreylediğimde onlar dahi yedimden ahz ü kabz ve üzerini bi’r-rızâ kendi mâllarından itmâm ile zikrolunan sed dîvârı hâlis harcla mahrûc ve zirâ‘da bir künk vaz‘ olunarak metîn ve müstahkem ve tûlen on bir zirâ‘ altı parmak ve arzan bir buçuk zirâ‘ ve kadden beş zirâ‘ on beş parmak olmak üzre müceddeden binâ ve inşâya ta‘ahhüd eyledik deyü mukırr-ı asîl ve vekîl-i merkūm es-Seyyid el-Hâc Mehmed Yâsin Ağa’nın takrîrini zimmiyûn-ı mersûmûn tasdîk ve bu vechile kat‘-ı nizâ‘ eylediklerini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 12 min-Ş sene 1242