İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 348 Hüküm no: 294 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divriği kazasına bağlı Zimera köyü ahalisinin tahsin-i emlak vergisini aralarında paylaşacakları Divriği kazâsında tekâlîf nizâmı husûsu Ma‘rûz Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar Anadolu’da Divriği kazâsına tâbi‘ kaydında Sâdıra ve elsine-i nâsda Zimera ta‘bîriyle meşhûr karye ahâlîsinden ashâb-ı arzuhâl Kigork v. Zarok ve Artin v. Hazer ve Bedros v. Parseh ve Avanes v. Melkon ve Zekin v. Haçador ve Avanes v. Karabet ve Serkiz v. Bogos zimmîler ve sâirleri meclis-i şer‘-i münîrde karye-i mezbûre ihtiyârlarından olup bi’l-maslaha Der-aliyye’ye gelmiş olan arzuhâlde isimleri mezkûr el-Hâc Mehmed b. Feyzullah kendinden asâleten ve diğer Mustafa b. Hüseyin’in vekîli olmağla vekâleten ve Mustafa b. Emrullah nâm kimesne dahi asâleten muvâcehelerinde üzerlerimize tahsîn-i emlâk için nâzile olan tekâlîfi beynlerimizde mülklerimize göre çekmek lâzım iken merkūmûn muhâlefet etmeleriyle fîmâ-ba‘d karyemize vâride olan tekâlîfi mülklerimize göre mahâllinde tevzî‘ ve taksîm-birle kabzına me’mûra te’diye olunmak üzre merkūmûna tenbîh olunmak matlûbumuzdur dediklerinde onlar dahi fîmâ-ba‘d vâride olan tekâlîfi vech-i meşrûh üzre mülklerine göre iktisâma râzı ve müte‘ahhid olmalarıyla ba‘de’l-yevm ta‘ahhüdleri vechile fetvâ-yı şerîfe ve şurût-ı tekâlîf mûcibince amel ve hareket olunmak bâbında Divriği nâibi efendi dâ‘îlerine hitâben bir kıt‘a emr-i celîlü’ş-şân sudûrunu istid‘â ve istirhâm etmeleriyle yedlerinde olan fetvâ-yı şerîfede bir karye ahâlîsi üzerlerine tahsîn-i emlâk için nâzile olan tekâlîfi beynlerinde mülklerine göre çekmek lâzım olur deyü musarrah mevkūfât kaleminden derkenâr olunan tekâlîf şurûtunda dahi bir kazâya tâbi‘ kasaba ve mahallât ve kurâ ahâlîleri üzerlerinde mukayyed avârız ve nüzûl mâlını edâ ve emr-i aliyye ile vâride olan tekâlîfden dahi emlâk ve arâzî ve hâl ve tahammüllerine göre mahâllinde ma‘rifet-i şer‘ ve cümle ma‘rifetiyle ber-vech-i ta‘dîl ve tesviye [ve] tanzîm olunan tevzî‘ defteri mûcibince hisselerine düşeni tâbi‘ oldukları kazâ ahâlîleriyle bi’l-ma‘iyye edâ eylemeleri şurût-ı mer‘iyye-i tekâlîfdendir deyü mezkûr olmağın bu sûretde istid‘âları şer‘-i şerîf ve şurût-ı tekâlîfe muvâfık olduğu ma‘lûm-ı devletleri buyruldukda ber-vech-i istid‘â şurûtu derciyle emr-i âlî-şân i‘tâsı emr-i savâb idüğü İstanbul Mahkemesi’nden huzûr. Fî 12 Ş sene 1242