İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 357 Hüküm no: 302 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panako v. Nikola’nın talebiyle 9 yaşındaki kızı Angilid’in, annesinden alınıp kendisine teslim edildiği Sagīr teslîmi ve ibrâ Ma‘rûz Galata’ya muzâfe Ortaköy mütemekkinlerinden sahib-i arzuhâl Berber Yanako v. Nikola nâm zimmî Çarşamba günü Arz Odası’nda huzûr-ı lâmi‘u’n-nûr-ı sadâret-penâhîlerinde ma‘kūd meclis-i şer‘-i münîrde zevce-i sâbıkası derûn-ı arzuhâlde mezkûreti’l-ism mu‘arrefetü’ş-şahs Karniko bt. Andon Nasrâniye muvâcehesinde mersûme Karniko Nasrâniyeden olan sagīre kızım işbu hâzıra bi’l-meclis Angilid bi-hakkı’l-hıdâne anası mesfûrenin terbiyesinde iken mesfûre Angilid dokuz yaşını tekmîl edip müştehât olmağla kızım mesfûreyi bana teslîme mersûme Karniko Nasrâniyeye tenbîh olunmak matlûbumdur deyü da‘vâ ettikde mersûme Karniko Nasrâniye dahi sagīre-i mersûme dokuz yaşını tekmîl ile müştehât olduğunu tasdîk edip sinninde ihtilâf etmediklerinden mâ‘adâ huzûr-ı âlîlerinde sagīre-i mesfûreye nazar olundukda bi’n-nefs ekl ve şurb ve lebs ve istincâya kādire olarak âharın i‘ânesinden müstağniye olmağla ber-muktezâ-yı şerî‘at-i garrâ mersûme Angilid anası mesfûreden ahz ve babası mersûma teslîm olundukda mersûme Karniko Nasrâniye cevâbında müdde‘î-i mersûm Yanako zimmî beni tezevvüc ve sagīre-i mezbûre tevellüd ettikden sonra altı sene menzilime gelmemekle ben ol müddetde sagīre-i mersûmenin nafakasına kazâ ve rızâdan berî bulunmayarak mâlımdan bin dört yüz kırk guruş harc ve sarf etmemle meblağ-ı mezkûr bin dört yüz kırk guruşu dört sene mukaddem zevciyet beynimizde kāim iken mâlımdan beş yüz guruş nafaka ile yedimde olan müfredât defterinde muharrer mecmû‘u altı bin beş yüz beş guruş kıymetli eşyâ-i ma‘lûmemi ahz ve âhara bey‘le istihlâk etmekle nakd-i merkūm ile eşyâ-i mezkûrenin kıymetli [kıymeti] olan meblağ-ı merkūm altı bin beş yüz guruşu zamânen merkūm Yanako zimmîden taleb ederim dedikde evvelen meblağ-ı merkūm bin dört yüz kırk guruş nafaka mutâlebesi bu mertebe ile meşrû‘â olmadığı mersûme Karniko Nasrâniyeye tefhîm ve nakd-i merkūm ile eşyâ-i mezkûre müdde‘âsında mersûm Yanako zimmî istintâk olundukda külliyen inkârından mâ‘adâ ben işbu târihden on sekiz ay mukaddem mersûme Karniko Nasrâniyeyi tatlîk eylediğimde ma‘a’l-mürâbaha benden matlûbu olan iki bin altı yüz guruşu bi’r-rızâ tamamen mersûme Karniko Nasrâniyeye def‘ ü teslîm ol dahi ahz ü kabz edip bi’l-cümle husûs-ı mezkûra ve hukūk-ı <> zevciyete ve sâir beynimizde cereyân eden cemî‘ ahz ve i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl etmişdik deyü eylediği def‘ini mesfûre Karniko Nasrâniye münkire olmağın bu sûretde târih-i ibrâ muahhar olduğundan mersûm Yanako zimmî def‘-i meşrûhunu beyâna havâle olunmuşdu el-hâletü hâzihî mesfûre Karniko Nasrâniye bi’t-terâzî dâ‘îhânelerinde ma‘kūd meclis-i şer‘-i münîrde mersûm Yanako zimmî muvâcehesinde takrîr-i kelâm edip benim zevc-i sâbıkım mesfûr Yanako zimmî zimmetinde vechen mine’l-vücûh bir akçe ve bir habbe hakkım olmayıp ibrâ-i mezkûr vâki‘-i sahîh iken ben ba‘zı kimesnelerin tahrîk ve iğvâlarıyla da‘vâya tesâddî etmiş olmamla bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü mukırre-i mersûme Karniko Nasrâniyenin takrîr-i meşrûhunu mersûm Yanako zimmî tasdîk eylediği İstanbul Mahkemesi’nden huzûr. Fî 15 Ş sene 1242