İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 355 Hüküm no: 301 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan Çarşısı civarında yangından büyük zarar gören İmâm Ali Hanı’nın yıkılmasına karar verildiği İmâm Ali Hânı keşfi Ma‘rûz Sâdır olan fermân-ı âlîlerine imtisâlen zikri âtî husûsu mahâllinde lede’l-mu‘âyene keşf ve tahkīk için cânib-i şer‘-i mutahhardan me’zûnen irsâl olunan Kâtib Mehmed Hidâyetullah Efendi dâ‘îleri [ve] hâssa mi‘mârı hulefâsından Mehmed Tahir ve es-Seyyid Mehmed Nuri Halîfeler ile nezâret-i dâ‘îlerinde olan evkāfdan merhûme Nâzikî Hatun Vakfı müsakkafâtından İstanbul’da Mercan Çarşısı kurbünde İmâm Ali Hânı demekle ma‘rûf ma‘lûmü’l-hudûd bir bâb muhterik hâna varıp Hamamcıbaşı Mikayil ve dîvârcı esnâfının yiğitbaşısı Kosta ve dîvârcı ustası Pandeli zimmîler hazır oldukları hâlde akd-i <> meclis-i şer‘-i nebevî ettikde hân-ı mezkûrun kable’l-harîk kapısından girerken sağ tarafda nerdübân başında fevkānîsinde kâin birinci bir bâb odaya bâ-temessük-i mütevellî bi’l-icâreteyn müstakilleten mutasarrıfe olan şahsı mu‘arrefe Oskohi bt. Andon Nasrâniye ve ikinci bir bâb odaya kezâlik bâ-temessük-i mütevellî bi’l-icâreteyn müstakillen mutasarrıf olan Sâ‘atçi Kigork v. Toma ve üçüncü bir bâb odaya kezâlik bâ-temessük-i mütevellî bi’l-icâreteyn müstakillen mutasarrıf olan es-Seyyid el-Hâc Mehmed Ağa b. es-Seyyid İbrahim ve dördüncü bir bâb odaya kezâlik bâ-temessük-i mütevellî bi’l-icâreteyn müstakillen mutasarrıf olan Sandalcı Bogos v. Kigork zimmîlerden her biri asâleten ve hân-ı mezkûrun taşrasında olup zikrolunan birinci ve ikinci odalar tahtlarında kâin karakolhâne ve ittisâlinde bir bâb parçacı mağazası ve bir bâb attar dükkânı ve bir terzi peykesi beş sehm i‘tibârıyla iki sehm hissesine bâ-temessük-i mütevellî bi’l-icâreteyn mutasarrıflar olup kendi nefsinden asîl ve kız karındaşları Şerife Âişe ve Şerife Habibe Hatunlar taraflarından husûs-ı âtîde vekîl olduğu zâtlarını ârifân es-Seyyid Hüseyin Efendi b. Ali ve es-Seyyid Abdülkadir Ağa b. es-Seyyid Hüseyin şehâdetleriyle ber-nehc-i şer‘î sâbit olan el-Hâc Mehmed Emin Ağa b. Kızakçı el-Hâc Halil asâleten ve vekâleten ve üç sehm hissesine kezâlik bâ-temessük-i mütevellî bi’l-icâreteyn mutasarrıf olan Pirinççi es-Seyyid Mehmed Tahir Ağa b. el-Hâc Mustafa asâleten ve üçüncü bir bâb odanın tahtında bir bâb berber dükkânına bâ-temessük-i mütevellî bi’l-icâreteyn müstakilleten mutasarrıfe olan Âişe Hatun bt. İbrahim bilâ-veled fevt ve cânib-i vakfa âid ve râci‘ ve dördüncü bir bâb odanın tahtında bir bâb kalpakçı dükkânının sülüs hissesine bâ-temessük-i mütevellî bi’l-icâreteyn mutasarrıfe olan mu‘arrefetü’z-zât Hadîce Hatun bt. Abdullah ve sülüs-i âhar hissesine mutasarrıfe olan Sâliha Hatun bt. Abdullah dahi bilâ-veled fevt ve hissesi taraf-ı vakf-ı şerîfe âid ve râci‘ ve diğer sülüs-i âhar hissesine bâ-temessük-i mütevellî bi’l-icâreteyn mutasarrıf olan Hekîm Andon v. Ohannes zimmî asâleten her biri meclis-i ma‘kūd-ı mezkûrda vakf-ı mezbûrun bâ-berât-ı âlî-şân mütevellîsi sahib-i arzuhâl es-Seyyid Hasan Şevki Efendi b. Mehmed muvâcehesinde işbu derûnunda akd-i meclis-i şer‘-i âlî olunan hân-ı mezkûr bundan akdem vukū‘ bulan harîkde muhterik olup tarîk-ı âm tarafında olan odalar ile tahtlarında olan dekâkînin dîvâr ve ba‘zı sukūfu zâhiren kāim ve mevcûd ise de hatabları muhterik ve kemâl-i te’sîr-i harîk ile esâs ve ebniyesinde asla kuvvet ve metânet dahi kalmadığından hedm olunmaksızın bir vechile ta‘mîr kabûl etmeyeceği ve alâ-hâlihî terk olunduğu sûretde tabî‘atıyla münhedim olacağı fennen müteyakkın idüğü mi‘mârân-ı mezbûrân ve hâzırân-ı zimmiyân-ı mersûmenin [mersûmânın] ihbârlarıyla zâhir ve bedîdâr ve ma‘âzallahu te‘âlâ bağteten münhedim olur ise târik-ı cadde üzerinde olduğundan nüfûs-ı kesîre telef olacağı bedîhî ve âşikâr olmağla sıyâneten li’l-ibâd şifâhen sâdır olan fermân-ı cihân-mutâ‘a imtisâlen biz bi’l-asâle ve bi’l-vekâle zikrolunan oda ve dükkânlarımızı rızâlarımızla kendi mâllarımızdan teberru‘an li’l-vakf mütevellîsi merkūm ma‘rifetiyle müceddeden binâ ve inşâya ta‘ahhüd eylediklerimizde mütevellî-i merkūm dahi kabûl eyledi deyü bi’l-cümle takrîr-i meşrûhlarını mütevellî-i mezbûr es-Seyyid Hasan Şevki Efendi tasdîk eylediğini kâtib-i merkūm mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip tarafeyn hazır oldukları hâlde alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 8 Ş sene 1242